«Nur Otan» Maqtaral aýdanyna 400 tonnadan astam gýmanıtarlyq kómek jiberdi
NUR-SULTAN. QazAqparat – «Nur Otan» partııasy sý tasqynynan zardap shekken Maqtaral aýdanyna 400 tonnadan astam gýmanıtarlyq kómek jibergen.
Al «Jas Otan» volonterleri men belsendileri jergilikti jerde jetkizilgen kómekti turǵyndarǵa úlestirip berýmen aınalysyp jatyr. Bul týraly Nur Otan partııasy Tóraǵasynyń birinshi orynbasary Baýyrjan Baıbek Instagram paraqshasynda paraqshasynda jazdy, dep habarlaıdy QazAqparat tilshisi.
«Qurmetti dostar! Ózderińiz biletindeı, el Prezıdenti Qasym-Jomart Toqaevtyń tapsyrmasy boıynsha sý tasqynynan zardap shekken Túrkistan oblysy Maqtaral aýdanynyń turǵyndary tolyǵymen jańa jáne jóndelgen baspanaǵa ıe bolady. Árbir turǵyn respýblıkalyq bıýdjet esebinen 100 myń teńge alady. Elbasynyń tapsyrmasymen Memleket basshysy bastaǵan áleýmettik qoldaý sharalaryna qosymsha retinde «Nur Otan» maqtaraldyqtarǵa 400 tonna gýmanıtarlyq kómek jiberdi. Kómektiń ishinde jeke tazalyq quraldary, kıim-keshek, tósek oryn men basqa da kerek-jaraqtar bar», - dep jazdy Baýyrjan Baıbek.
Onyń habarlaýynsha, «Jas Otan» jastar qanatynyń volonterleri men belsendileri halyqqa kómekti taratyp berý jumysymen aınalysyp jatyr.
«Kómekti ýaqtyly uıymdastyrýǵa atsalysqan partııalastar men belsendilerge alǵys aıtqym keledi. Ásirese bizdiń partııanyń jastar qanatynyń jumysyn erekshe atap ótýge bolady. Birlik, yntymaq jáne ózara kómek qolyn sozý sekildi qasıetter tap osyndaı qıyn-qystaý sátterde kórinedi» - dep jazdy Baýyrjan Baıbek.
Sondaı-aq, ol Nursultan Nazarbaevtyń bastamasy boıynsha «Nur Otan» partııasy men «Birgemiz» qory qazaqstandyqtarǵa ataýly kómek kórsetýdi jalǵastyryp jatqanyn tilge tıek etti.
«Búgingi kúnge deıin 150 myńnan astam otbasy azyq-túlik sebeti men antıseptıkalyq qural aldy. Buǵan qosa 100 myń otbasy tegin maskamen qamtamasyz etildi. 360 myń otbasy 50 myń teńgeden bir jolǵy tólemmen qamtyldy. Otbasy múshelerin qosa eseptegende, bul shamamen 1 mln qazaqstandyqty quraıdy» - dedi partııa Tóraǵasynyń birinshi oranbasary.
