«Nur Otan» HDP jáne Azıada-2011 uıymdastyrý komıteti arasynda áriptestik týraly kelisim jasaldy
ASTANA. Tamyzdyń 6-sy. QazAqparat /Jasulan Amanbaıuly/ - Búgin, tamyzdyń 6-sy kúni «Nur Otan» HDP jáne 2011 jylǵy 7-shi Qysqy Azııa oıyndarynyń uıymdastyrý komıtetiniń atqarýshy dırektsııasy arasynda ózara túsinistik jáne áriptestik kelisimine qol qoıyldy, dep habarlaıdy QazAqparat.
Memorandýmǵa Partııa Tóraǵasynyń birinshi orynbasary Nurlan Nyǵmatýlın men 7-shi Qysqy Azııa oıyndarynyń uıymdastyrý komıetiniń atqarýshy dırektsııasynyń prezıdenti Anatóli Qulnazarov qol qoıdy.
«Álemdik qaýymdastyq Qazaqstannyń ekonomıkasyndaǵy, áleýmettik jobalaryndaǵy jetistikterin moıyndady. Endi biz Qazaqstannyń keń kólemdi dodany, Qysqy Azııa oıyndaryn ótkizýge múmkindik alyp otyrǵan sport salasyndaǵy iri derjavalardyń qataryna kirip otyrǵandyǵyna kýámiz», dep atap kórsetti N. Nyǵmatýlın.
Onyń aıtýynsha, memorandýmǵa sáıkes Oıyndardy uıymdastyrý jumystary, sondaı-aq soǵan baılanysty josparlanǵan aktsııalar men sharalar birlesip ótkiziletin bolady. Sonymen qatar partııa tarapynan tolyq aqparattyq kómek kórsetiledi.
«Osynyń barlyǵy alǵashqy partııalyq uıymdardyń, qurylymdyq bólinisterdiń jiti nazarynda bolady», deıdi ol.
«Qazaqstannyń Álemdegi sport derjavalarymen birge deńgeılese alatyndaı barlyq alǵysharttary bar dep bilemin», dep atap kórsetti N. Nyǵmatýlın.
Eske sala keteıik, 7-shi Qysqy Azııa oıyndary 2011 jyly qańtardyń 30-y men aqpannyń 6-sy aralyǵynda Astana men Almaty qalalarynda ótedi.
