«Nur Otan» fraktsııasynyń qatysýymen Úkimettiń arnaıy otyrysyn ótkizý qajet - Tuńǵysh Prezıdent

NUR-SULTAN. QazAqparat – «Nur Otan» partııasynyń Májilistegi fraktsııasynyń qatysýymen Úkimettiń arnaıy otyrysyn ótkizý qajet. Bul týraly «Nur Otan» partııasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy QazAqparat tilshisi.

«Partııanyń Májilistegi fraktsııasynyń qatysýymen Úkimettiń arnaıy otyrysyn ótkizýdi jáne qalǵan máselelerdi talqylaýdy usynamyn. Munan Úkimetke tek paıda bar. Jáne de sheshilmegen máselelerge basymdyq bere otyryp, jumystardyń nátıjesin jarııa túrde baıandaý kerek», - dedi Elbasy.

Qazaqstan Tuńǵysh Prezıdenti «Nur Otan» partııasy men Úkimet birlese jumys isteýi qajettigin basa aıtty.

«Biz bir ortaq máseleni – qazaqstandyqtardyń ál-aýqaty men elimizdiń Táýelsizdigi maqsatyn sheshemiz. Bólip-jaratyn eshteńe joq. Mundaı sheshimder halyqtyń múddesi úshin, halyq úshin qabyldanady. Demek, bul máselelerdi birlesip sheshýimiz qajet», - dedi N.Nazarbaev.