«Nur Otan» fraktsııasynyń Áleýmettik keńesinde sottalǵandardy áleýmettik beıimdeý máselesi qaralady

ASTANA. QazAqparat - QR Parlamenti Májilisiniń Áleýmettik-mádenı damý komıteti jáne «Nur Otan» partııasy fraktsııasynyń janyndaǵy Áleýmettik keńestiń birlesken otyrysy ótedi. Onda «Qylmystyq jazaǵa tartylǵan tulǵalardyń áleýmettik beıimdelýi jáne ıntegratsııasynyń máseleleri» taqyryby talqylanady. Bul týraly Májilistiń baspasóz qyzmetinen habarlady.

Taqyryp aıasynda QR Іshki ister mınıstrliginiń Qylmystyq-atqarý júıesi komıteti tóraǵasynyń orynbasary Azamat Bazylbekov qylmystyq jazaǵa tartylǵan tulǵalardyń áleýmettik beıimdelý máseleleri týraly baıandama jasaıdy. Sonymen qatar Densaýlyq saqtaý jáne áleýmettik damý vıtse-mınıstri Svetlana Jaqypova qylmystyq jazaǵa tartylǵan tulǵalardyń áleýmettik kómekpen qamtylýyna toqtalatyn bolady.

Budan bólek, «Halyqaralyq túrme reformasy» halyqaralyq qoǵamdyq uıymy ókildiginiń óńirlik dırektory Azamat Shambılovtyń baıandamasy da kútiledi. Jıynǵa Parlament depýtattarynan bólek, óńirlerdegi birqatar mekemeler basshylary shaqyrylǵan.