«Nur Otan»-dy qaıta jańǵyrtý jumystaryna elge janashyr azamattar tartylady - Túrkistan

TÚRKІSTAN. QazAqparat -Túrkistan oblysynda «Nur Otan» partııasynyń kadrlyq rezervine jastar men áıelder jáne belsendi azamattar tartylady. Bul týraly búgin Túrkistanda ótken «Nur Otan» partııasynyń Túrkistan oblystyq fılıalynyń aktıvinde belgili boldy, dep habarlaıdy QazAqparat tilshisi.

Alqaly jıynǵa oblys ákimi, partııa fılıalynyń tóraǵasy Ómirzaq Shókeev tóraǵalyq jasap, júrgizip otyrdy. Aktıv otyrysynda 2019 jyldyń 25 qarashasynda Elbasy, partııa Tóraǵasy N.Á.Nazarbaevtyń tóraǵalyǵymen ótken óńirlik partııa fılıaldary ókilderimen kezdesý barysynda júktelgen mindetterdi oryndaý jáne jańa bastamalardy júzege asyrý máseleleri talqylandy.

Partııa fılıaly tóraǵasynyń birinshi orynbasary Beısenbaı Tájibaev Elbasy qoǵamdaǵy ózekti máselelerdi dóp basyp, partııaǵa mańyzdy tapsyrmalar júktegenin jetkizdi. Sondaı-aq óńirde atqarylǵan jumystarǵa toqtaldy.

Onyń aıtýynsha, jyl basynan beri barlyq deńgeıdegi máslıhat depýtattary - fraktsııa músheleri túrli máseleler boıynsha bıyl 10 aıda 637 jeke qabyldaý júrgizip, 1241 azamattyń máselelerin qaraǵan. 10 aıda partııa fılıaldarynyń 17 qoǵamdyq qabyldaý bólmesine 7047 aryz túsip, onyń 3297-i (46,7%) ońtaıly sheshilgen. «Qabyldaýlarda basshylar tarapynan kózboıaýshylyq pen syrǵytpa jaýapqa jol berilmeýi úshin áleýmettik jelide tikeleı efır arqyly kórsetilýde. Osy jumystar nátıjesinde turǵyndardyń partııaǵa senimi arta tústi deýge bolady. Partııanyń kadrlyq rezervine úmitkerlerdi irikteý pılottyq jobasy boıynsha Túlkibas aýdany respýblıkada aldyńǵy qatardan kórindi. Bul jobany barlyq aýdan, qalalarda ótkizýdi josparlap otyrmyz. Osy arqyly biz qarapaıym eldiń arasynan memleketke shynaıy janashyr, otanshyl, belsendi azamattardy qatarymyzǵa qosyp, máslıhattarǵa usynamyz. Partııa tóraǵasy osyndaı mindet júktep otyr», – degen ol depýtattar men basshylardyń jaýapkershiligin kóterý jóninde de usynystaryn aıtty. Jıynda Túrkistan oblystyq máslıhattyń hatshysy Qaırat Balabıevtiń baıandamasy tyńdaldy. Sonymen birge jaryssózge shyqqan «Nur Otan» partııasynyń Túrkistan oblystyq máslıhatyndaǵy depýtattyq fraktsııa jetekshisi Murat Tóltebaev, Túlkibas aýdandyq úsh tilde oqytatyn mamandandyrylǵan mektep-ınternatynyń dırektory Farıda Piralıeva jáne «Kentaý transformator zaýyty» bastaýysh partııa uıymynyń tóraǵasy Haırýlla Qojabaev ta pikirlerin aıtyp, partııany jańǵyrtý baǵytyndaǵy jumystardy qoldaıtyndaryn jetkizdi. Aktıv otyrysyn oblys ákimi, «Nur Otan» partııasy Túrkistan oblystyq

fılıalynyń tóraǵasy Ómirzaq Shókeev qortyndylady. Ol Elbasy, «Nur Otan» partııasynyń Tóraǵasy Nursultan Nazarbaevtyń aımaqtyq fılıal ókilderimen kezdesýinde berilgen tapsyrmalary boıynsha jumys kúsheıetinin málimdedi. Partııany qaıta jańǵyrtý baǵytynda elge janashyr, naǵyz kóshbasshy azamattarǵa múmkindik beriletinin aıtty. «Partııalyq praımerızdi túsindirý jáne daıyndyq jumystary boıynsha semınarlar ótkizilsin. Naqty jergilikti máselelerdi esepke ala otyryp, saılaýaldy baǵdarlamanyń jobasy ázirlenýi tıis. Partııa fılıaly partııalyq kadrlyq rezerv quramyn jańa talaptarǵa saı jasaqtap, 2020 jyldyń 10 qańtaryna deıin usynsyn. Jańa tizimde áıelderdiń úlesi 30 paıyzdan, 35 jasqa deıingi jastardyń úlesi 20 paıyzdan kem bolmaýy tıis. Sonymen qatar qoǵamnyń belsendi ókilderi de rezervke alynsyn. Partııanyń jemqorlyqqa qarsy qoǵamdyq keńesteri, baqylaý komıssııalary jumysty shıratsyn. Partııany qaıta jańǵyrtý boıynsha jumystar jalǵasady», – degen oblys ákimi jıyn sońynda bir top azamatqa QR Prezıdenti Qasym-Jomart Toqaevtyń alǵyshatyn, al jańadan qabyldanǵan 4 azamatqa partııa bıletin tapsyrdy.