«Nur Otan» bilim salasynyń «úzdik» jemqorlaryn tanystyrdy

ASTANA. QazAqparat - Búgin "Nur Otan" partııasynyń ortalyq apparatynda sybaılas jemqorlyqqa qarsy jol kartasyn iske asyrý jaıy qaraldy. Osy joly bilim salasyndaǵy jemqorlyq máselesi talqyǵa salyndy. Aıta ketken jón, partııa ol jumysty QR Memlekettiq qyzmet isteri jáne sybaılas jemqorlyqqa qarsy is-qımyl agenttigimen birge atqaryp keledi, dep xabarlaıdy QazAqparat tilshisi.

Agenttik tóraǵasynyń orynbasary Alık Shpekbaevtyń aıtýynsha, búginde bilim salasyndaǵy jemqorlyq áreketteriniń sany ósip keledi. Jemqorlardyń alǵan parasy da az emes.

"Máselen, burynǵy vıtse-mınıstr Saıat Shaıaxmetovtyń qatysýymen iske asqan jemqorlyq áreketi úlken qoǵamdyq rezonans týǵyzdy. Atalǵan is boıynsha memleketke kelgen shyǵyn 1,5 mlrd teńgeni qurady. Aqtóbe oblysynda bilim salasyndaǵy baqylaý departamentiniń basshysy Ákimgereı Kósherbaev úsh jylǵa sottaldy. Ol attestatsııanyń oń sheshimi úshin pedagogtardan aqsha jınaǵan. Sóıtip oblystaǵy tórt mektepten 1,5 mln teńge para aldy. Pavlodar oblysynda biryńǵaı ulttyq testileýdi sátti tapsyrǵany úshin aqsha jınaý faktisi de anyqtaldy. Ony Ekibastuz qalalyq bilim berý bóliminiń basshysy Nurjamal Maqumova uıymdastyrǵan. Ol qaladaǵy barlyq 45 mektep dırektorynan 100 myńnan jınap, 4,5 mln teńge kóleminde para aldy. Dırektorlar bolsa, aqshany ata-analardan jınaýǵa májbúr boldy", - dedi Shpekbaev.

Budan bólek, otyrysta Qyzylorda oblysynyń bilim berý salasyndaǵy baqylaý komıtetiniń burynǵy basshysy Rýslan Chagaı, Qaraǵandy oblysy Shet aýdandyq bilim berý bóliminiń jetekshisi bolǵan Erbol Rysbek pen Sátpaev qalalyq bilim basqarmasynyń burynǵy basshysy Shynar Jańasylova osy salanyń «úzdik jemqorlary» retinde tanystyryldy.

«Bilim salasyndaǵy tekseristerdiń nátıjesi boıynsha ótken jyly 46 adam jaýapqa tartylsa, osy jyldyń alty aıynda ondaı adamdardyń sany 26-ǵa jetti. Olardyń ishinde Mańǵystaý oblysy boıynsha bilim salasyndaǵy baqylaý departamentiniń basshysy Esbolat Ómirzaq qyzmetine saı emes dep tanylsa, Batys Qazaqstan oblysy Aqjaıyq aýdandyq bilim berý bóliminiń basshysy Mereke Zınalıev jáne Muǵaljar aýdandyq aýdandyq bilim bólimi basshysynyń orynbasary Qulet Amangeldi jumystan qýyldy", - dep atap kórsetti Alık Jatqambaıuly.

Otyrysqa QR Bilim jáne ǵylym vıtse-mınıstri Bıbigúl Asylova da qatysty. Onyń aıtýynsha, bıyldan bastap mektepterdiń attestatsııasy tolyǵymen toqtatyldy. Sebebi dál osy salada jemqorlyq áreketteri kóp bolǵan. "Negizi, josparly attestatsııany zańnan múldem alyp tastaıtyn shyǵarmyz. Aryz-shaǵymdar boıynsha baqylaý sharalary ǵana qalady. Al bilim salasyndaǵy baqylaý departamentteriniń qyzmeti ózgeretin bolady. Olar aımaqtarda bilim berýdi damytýǵa kómektesedi", - dedi Asylova.

Aıta keteıik, memlekettik granttardy bólý quzyreti ýnıversıtetterdiń ózderine berilgennen keıin osy salada jemqorlyq máselesi ýshyǵyp ketti.  Alaıda búginde akademııalyq ádildigi joǵary, ıaǵnı sybaılas jemqorlyqty barynsha azaıtqan joǵary oqý oryndary bar.