Nur Otan: Atyraýdan Májiliske úsh úmitker usynyldy

ATYRAÝ. QazAqparat –Atyraýda «Nur Otan» partııasy oblystyq fılıalynyń kezekten tys HHHІІ konferentsııasy ótip, QR Parlamenti Májilisiniń depýtattyǵyna úmitkerler usynyldy, dep dep habarlaıdy QazAqparat.

Óńirlik fılıal tóraǵasy, oblys ákimi Mahambet Dosmuhambetovtiń aıtýynsha, praımerız kezeńinde partııa múshelerinen 1061 usynys túsken. Onyń 448-i saılaýaldy baǵdarlamalarynyń jobasynda kórinis tapqan. Al saılaýaldy baǵdarlamalardyń jobasyna 12 tolyqtyrý men ózgeris engizilgen.

Konferentsııada 8 úmitker debatqa qatysyp, saılaýaldy baǵdarlamalaryn tanystyrdy. Delegattardyń daýys berýimen Májiliske saılanatyn depýtattardyń partııalyq tizimine úsh úmitker irikteldi. Eń kóp daýys Dúısenbaı Turǵanovqa berildi. Onyń úlesinde 107 daýys bar. Al, Sálimjan Naqpaev 98 daýysqa ıe boldy. Kóp daýys alǵan bul úmitkerdiń ekeýi de – jeke sektor ókili. Úshinshi úmitker Qyzylqoǵa aýdandyq máslıhatynyń hatshysy Tolqyn Beıisqalı 74 daýys jınady.

«Praımerız kezeńinde partııa múshelerinen túsken usynystar men amanattar eskerildi. Sonyń negizinde oblystyq fılıaldyń saılaýaldy baǵdarlamasy jobasy qabyldandy» -dedi oblystyq fılıal tóraǵasynyń birinshi orynbasary Nurlybek Ojaev.

Sondaı-aq, konferentsııada oblystyq máslıhattyń partııalyq tizimine 47 úmitker endi. Olardyń 25 paıyzyn jastar, al, 30 paıyzyn áıelder qurady.