«Nur Otan» Atyraý men Pavlodarda ІT-mamandar daıyndaıtyn ortalyqtar ashty

 ASTANA. QazAqparat - Búgin Atyraý jáne Pavlodar oblystarynda «ІT-mamandardy daıyndaý» partııalyq jobasy negizinde ІT-ortalyqtary iske qosyldy, dep habarlady «Nur Otan» partııasy Ortalyq apparatynyń baspasóz qyzmetinen.

Jobaǵa eń alǵash bolyp Pavlodardyń Innovatsııalyq Eýrazııa ýnıversıteti ún qosqan. «ІT-mamandardy daıyndaý» partııalyq jobasyn iske asyrý aıasynda JOO-da ІT-ortalyq ashylyp otyr. Atalǵan is-sharaǵa Pavlodar oblysy ákiminiń orynbasary Álııa Arynova, «Nur Otan» partııasy Pavlodar oblystyq fılıaly tóraǵasynyń birinshi orynbasary Ilıa Terenchenko, InEÝ rektory Marat Baıandın men Aımaqtyq kásipkerler palatasy dırektorynyń orynbasary Mádı Syzdyqov qatysty.

Bul búkil Qazaqstan boıynsha ashylýy josparlanyp otyrǵan 20 ІT-ortalyqtyń alǵashqysy. Ortalyqta jumyssyzdar men ózin-ózi jumyspen qamtýshy jastar irikteý synaǵynan ótedi. Ony sátti tapsyrǵan jaǵdaıda tyńdaýshy oqýdy bastaıdy. Qazirdiń ózinde 44-ten astam ótinish tústi. «Nur Otan» bul jobany «Atameken» UKP birigip iske asyryp otyr. Óz sózinde Ilıa Terenchenko atap ótkendeı, uıymdastyrýshylar úshin eń mańyzdysy - eńbek naryǵynda olar ári qaraı suranysqa ıe bolatyndaı bilikti mamandardy daıyndaý.

«Partııalyq jumysty ári qaraı jańartý maqsatynda partııa basshylyǵy 22 jańa jobany qolǵa alǵany belgili. Pavlodar oblysynda jańa partııalyq jobany iske qosý boıynsha jumystar bastaldy. Sonyń ishinde, aımaqta pılottyq rejimde 3 jańa partııalyq joba júzege asyrylady. Solardyń biri - «ІT-mamandardy daıyndaý» jobasy, - deıdi I. Terenchenko.

InEÝ oqytýshysy Elena Malyshevanyń aıtýynsha, tyńdarmandardy úlken jumys kútip tur.

"Oqytý baǵdarlamasynyń kólemi óte úlken. Oqytýdaǵy 200 saǵat boıy jastar teorııany da, praktıkany da meńgeretin bolady. Biz oqytý aıaqtalǵan kezde tyńdaýshylar  Android qosymshasyn ózdiginen ázirleý men ony  Play Market-ke salatyn deńgeıge jetedi dep úmittenemiz", - deıdi ol.  

Jobanyń maqsaty - azamattardyń tsıfrlyq saýattylyǵyn arttyrý men bilikti ІT-mamandar ortaqtastyǵyn daıyndaý. Jobany iske asyrý aıasynda jumyssyz jáne ózin-ózi jumyspen qamtyǵan jastardy qosqanda, búkil memleket boıynsha 100 myń adamdy, jyl saıyn búkil aımaqty tolyqtaı qamtı otyryp 35 myń adamdy oqytý josparlanyp otyr. Jastar suranysqa ıe tsıfrlyq mashyqtar men zamanaýı baǵdarlamalaý tilderin oqıtyn bolady.