«Nur Otan» ataýy ózgerdi: Halyq AMANAT-yna adaldyq tanytý - bılikke sert
«AMANAT» partııasyn jańǵyrtýdyń 7 baǵyty
Sonymen partııa hatshysy jarııa etken jańǵyrýdyń birinshi basymdyǵy halyqpen keri baılanys jasaý quraldarynyń tıimdiligin arttyrýdy kózdeıdi. Osyǵan oraı partııa janyndaǵy qoǵamdyq keńesterdiń qurylymy qaıta jasaqtalyp, respýblıkalyq deńgeıde – 9, aımaqtarda – 8, aýdandarda – 5 keńesten ǵana qaldyrylady. Nátıjesinde el aýmaǵy boıynsha keńester sany 700-ge qysqarady. Buǵan qosa olardyń quramy jańartylyp, belsendiligi tómen keńes músheleriniń ornyna eldiń sózin sóıleıtin tulǵalar tartylady. Keńes otyrystary barynsha ashyq, onlaın formatta ótkiziledi. Qoǵamdyq qabyldaý jumysy da ózgerisge ushyraıdy.
«Osylaısha bılik, partııa men azamattyq qoǵam arasyndaǵy jan-jaqty dıalogtyń jańa mádenıetin qalyptastyramyz», - dedi ol.
Ekinshi basymdyq – jergilikti jerlerde partııalyq qatardy nyǵaıtý jumystaryn kúsheıtý. Búginde elimizde partııanyń negizi sanalatyn bastapqy partııalyq 4,5 myńnan astam uıym bar. Aldaǵy ýaqytta bir-birimen biriktirilip, irilendiriledi. Bastapqy uıym tóraǵalarynyń belsendiligin, utqyrlyǵy men jaýapkershiligin arttyrý úshin olardy baǵalaý jáne reıtıngin túzý qolǵa alynady. Kadrlyq jumysty jolǵa qoıý maqsatynda jańa Qazaqstandy qurýǵa qabiletti, halyqqa adal qyzmet etetin saıasatkerlerdiń jańa býyny daıyndalady. Partııanyń Saıası menedjment mektebinde bıyl 3 myńnan asa partııa múshesin, onyń ishinde depýtattardy, aýyl ákimderin, bastapqy partııalyq uıym múshelerin saıası menedjment pen kommýnıkatsııanyń jańa formattaryna úıretetin keshendi oqytý júrgiziledi.
Úshinshi basymdyq - partııa jumysynyń barynsha ashyq bolýy.
«Búgingi tańdaǵy qoǵamnyń asa ózekti suranystarynyń biri – partııanyń ashyqtyǵy jáne halyqqa jaqyn bolýy. Pılottyq joba retinde máslıhattardaǵy «Nur Otan» depýtattarynyń reıtıng júıesi tolyqtaı synaqtan ótti. Onyń nátıjesin jurtshylyqqa jarııa etýdi usynamyz. Munymen qatar, partııalyq mobıldi qosymsha iske qosylady. Onda azamattar partııanyń jumysy týraly jedel aqparat alyp, qoǵamdyq mańyzdy máselelerge baılanysty túrli saýalnamalarǵa qatysyp, ótinish pen usynys-tilekterin qaldyra alady», - dedi Ashat Oralov.
Tórtinshi basymdyq – partııalyq baqylaýdy kúsheıtý. Bul rette jaýapkershilik partııanyń eń basty strategııalyq basymdyqtarynyń biri bolyp qala beredi. Saılaýaldy ýádelerdiń sapaly ári der ýaqytynda oryndalýyna basa mán beriledi.
Besinshi basymdyq - qazirgi tańdaǵy ózgeristerge saı partııanyń basty baǵdarlamalyq qujattary qaıta qaralady. Ol úshin eń áýeli partııanyń Jarǵysyna ózgerister engiziledi. Partııanyń jáne onyń fılıaldary tóraǵasynyń birinshi orynbasary qyzmetiniń ornyna atqarýshy hatshy qyzmeti engiziledi.
Altynshy basymdyq – halyqpen jumysta qaýyrt ádisin qoldaný. Osyǵan oraı qazirgi qoldanystaǵy partııalyq jobalarmen qatar halyqtyń ózekti suranystaryn eskere otyryp «TazaLike», «Áleýmet», «Jańa Qazaqstan úshin 30 ınnovatsııalyq ıdeıa» atty jobalar iske qosylady.
Jetinshi basymdyq - «Jas Otan» jastar qanatynyń jumysyn tolyqtaı qaıta jańǵyrtý. Ol úshin «Jas Otan» qataryna jastar arasynda shyn bedeli bar naǵyz kóshbasshylar tartylady. Aýyl jastaryna arnalǵan «Órleý» atty jańa partııalyq joba usynylady. Onyń aıasynda elimizdiń túkpir-túkpirindegi jastardyń tulǵalyq damýyna, shyǵarmashylyq qabiletterin shyńdaýǵa arnalǵan, olardy kásip ashyp, tabysty bolýǵa yntalandyratyn keshendi is-sharalar júzege asyrylady.
«Budan bólek, jas urpaqty otansúıgishtikke baýlıtyn «Qaısar» atty jańa áskerı-patrıottyq joba iske qosylady. El qorǵaıtyn, memleketimizge qyzmet etetin erjúrek azamattardy tárbıeleýge basymdyq beriledi», - dedi partııanyń atqarýshy hatshysy.
Partııanyń ózgerýi – zańdylyq
Saıası uıymnyń kezekten tys sezi barysynda Májilis tóraǵasy Erlan Qoshanov «Nur Otan» partııasynyń ataýyn «Amanat» dep ózgertýdi usyndy. Al alqaly jıyndy qorytyndylaǵan QR Prezıdenti Qasym-Jomart Toqaev zaman, qoǵam, adam ózgerip jatqanda, partııanyń ózgerýi zańdylyq ekenin aıta kele saıası uıymnyń ataýyna baılanysty pikirtalasqa qatysqanyn jasyrmady.
«Birneshe usynys boldy, sonyń ishinen Amanat degen ataýǵa toqtadyq. Bul – elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», - deı kele Memleket basshysy partııany resmı túrde Amanat dep ataýdy tolyq qoldaıtynyn jetkizdi. Sonymen qatar Prezıdent birqatar basym mindetti aıqyndap, eń aldymen, ortalyqqa táýeldilikti joıý jáne partııa apparatynyń tıimdiligin arttyrý qajettigine nazar aýdartty.
«Partııa apparatynyń jumysynda bıýrokratııanyń teris sıpattary anyq kórindi. Jelilik kesteler, esep berý jáne qaǵaz júzindegi is-sharalar saılaýshylarmen tikeleı jumys isteýdi ekinshi orynǵa syrǵytty. Jumysqa qulshynyp turǵan azamattar óz oryndaryn darynsyz fýnktsıonerlerge berýge májbúr boldy. Sondyqtan ortalyq apparattyń fılıaldarmen jáne bastaýysh partııalyq uıymdarmen ózara is-qımyl ádisterin tolyǵymen qaıta qaraý qajet. Bıýrokratııa men qaǵazbastylyqtan úzildi-kesildi bas tartý kerek. Aımaqtyq fılıaldar men bastaýysh uıymdary saılaýshylarmen ózdiginen jumys isteı alady jáne jumys isteýge mindetti. Ortalyq apparat nusqaýshylyq jáne «qolmen» basqarý tájirıbesinen arylýǵa tıis», – dedi Memleket basshysy.
Qasym-Jomart Toqaevtyń aıtýynsha, Májilis pen máslıhattardaǵy fraktsııalardyń qyzmetin jandandyrý qajet. Depýtattyq fraktsııalar dıalog alańdaryn uıymdastyrý mindetin ózderine alyp, olardyń jumys qorytyndysy boıynsha naqty nátıjege qol jetkizýi kerek.
«Áleýmettik jeliler men qala alańdaryndaǵy qoǵamdyq talqylaýlardy Parlament pen máslıhattarda ótkizgen jón. Bul – asa mańyzdy mindet. Fraktsııalar depýtattyq saýaldarmen shektelip qalmaı, parlamenttik jáne qoǵamdyq talqylaýlar men ashyq pikir-saıystarǵa barýǵa tıis. Kerek bolsa, Úkimettiń naqty músheleri men ákimderge senim máselesin kóterý qajet. Barlyq deńgeıdegi partııa depýtattarynyń reıtıngi aldyn ala daıyndalǵan esepterge emes, naqty ister men azamattardyń máselelerin sheshýge negizdelýi kerek», – dedi partııa Tóraǵasy.
Memleket basshysy azamattardyń múddelerin ilgeriletýdi jáne partııanyń ashyqtyǵyn basty másele retinde aıqyndady.
«Partııa popýlızmge salynyp, oryndalmaıtyn ýáde bermegeni jón. Sonda Premer-Mınıstr men kabınet múshelerinen qajetti sandardy talap etýge de jol berilmeıdi. Eger osylaı jalǵasa berse, kúdik kúsheıip, adamdardyń partııaǵa degen senimi joǵalady. Al onyń partııaǵa keri áseri tıedi. Bundaı kózboıaýshylyqtyń saldary adamdardyń áleýmettik kóńil-kúıine jáne ishki saıası turaqtylyqqa yqpal etedi. Buǵan, ásirese, geosaıası turaqsyzdyq jaǵdaıynda jol berýge bolmaıdy. Saılaýshylarmen keri baılanysty kúsheıtken jón jáne osy baǵytta qoǵamdyq qabyldaýlardyń áleýetin barynsha paıdalaný qajet», – dedi Prezıdent.
Qasym-Jomart Toqaev jyldar boıy únsiz bolǵan, saıasatpen aınalysyp júrgen keıbir adamdar qazirgi «jylymyqty» paıdalanyp, áleýmettik jelige jappaı shyǵa bastanyna da nazar aýdartty.
«Olar aqparattyq keńistikti jaılap aldy deýge bolady. Neshe túrli qaýesetter, jalǵan aqparat tarap jatyr. Mundaı ahýal eldi adastyrýy múmkin. Ashyǵyn aıtsaq, bizdiń josparlarymyzdy, qolǵa alyp jatqan is-sharalarymyzdy kópshilik bile bermeıdi. Partııa belsendileri zamanaýı aqparat quraldaryn paıdalanyp, saıasatymyzdy jurtqa jan-jaqty túsindirýi qajet. Men úshin eń basty qundylyq – Qazaqstannyń Táýelsizdigi. Memleket basshysy retinde elimizdiń qaýipsizdigi men halqymyzdyń amandyǵyn qamtamasyz etý úshin qoldan kelgenniń bárin jasaımyn. Jaýapkershilik júgi qanshama aýyr bolsa da, odan esh qaımyqpaımyn», - dedi Qasym-Jomart Kemeluly.
