«Nur Múbárak» ýnıversıtetiniń ókilderi Oralda bolyp, dáris berdi

ORAL. QazAqparat - «Nur Múbárak» Egıpet ıslam mádenıeti ýnıversıtetiniń rektory, professor, doktor Jýda Abdýlǵanı Basıýnı men osy oqý ornynyń oqytýshysy, doktor Muhamad Ámın Álı Oralda bolyp, ımamdar men teologtar aldynda dáris oqydy, dep habarlaıdy «QazAqparat» tilshisi.

BQO prokýratýrasynyń baspasóz qyzmetinen túsken málimetke qaraǵanda, zańdylyqty, quqyq tártibin jáne qylmyspen kúres jónindegi oblystyq úılestirý keńesiniń sheshimderin oryndaý maqsatynda oblys ákimdiginiń shaqyrýymen kelgen meımandar oqytý semınaryn ótkizdi.

Shara maqsaty - jergilikti ımamdar men aqparattyq-túsindirý toptary teologtarynyń biliktiligin kóterý. Aldymen olar Dostyq úıinde ıslam dinindegi nekege, otbasylyq qarym-qatynastarǵa jáne basqa ózekti máselelerge qatysty dárister oqydy. Sodan keıin Oral meshitterinde jergilikti jamaǵatpen kezdesip, saýaldaryna jaýap  berip, pikir almasty.

Úsh kúnge sozylǵan semınar sońynda qatysýshylarǵa sertıfıkattar berildi.