«Nur-Múbarak» Egıpet ıslam mádenıeti ýnıversıtetiniń ataýy ózgerdi
ASTANA. 23 qarasha. QazAqparat - 22-23 qarashada Almaty qalasynda «Nur-Múbarak» Egıpet ıslam mádenıeti ýnıversıteti Qamqorlar keńesiniń kezekti tórtinshi otyrysy ótti.
Bul týraly QR Din isteri agenttiginiń baspasóz qyzmeti habarlady.
Osy joly ýnıversıtettiń Qamqorshylar keńesine QR Din isteri agenttiginiń tóraǵasy Qaırat Lama Sharıf pen Mysyrdyń Ýaqyftar mınıstri doktor Talǵat Afıfı basshylyq etti. Májiliske QR Bilim jáne ǵylym mınıstriniń orynbasary Murat Ábenov, ál-Ázhar ýnıversıtetiniń rektory Ýsama ál-Abd, Qazaqstannyń Kaırdegi elshisi Berik Aryn men Egıpettiń Astanadaǵy elshisi Nabıla Salama jáne taǵy basqa laýazymdy tulǵalar qatysty.
Qazaqstandaǵy joǵary bilimdi ımamdar, ıslamtanýshylar men dintanýshylar daıyndaıtyn «Nur-Múbarak» ýnıversıteti Qazaqstan Respýblıkasy men Egıpet Arab Respýblıkasy úkimetteri 2001 jyly qol qoıǵan kelisim sheńberinde jumys atqarady.
Qamqorshylar keńesinde Qaırat Lama Sharıf Qazaqstanda dástúrli din ilimin ıgergen, zaıyrly bilimi de jetik mamandarǵa degen muqtajdyq artyp otyrǵanyn atap ótti. Qazaqstan úshin dástúrli hanafı mazhabyn nasıhattaý, onyń ustanymdaryn ǵylymı turǵydan zertteý, halyqqa keńinen tanytý qazirgi jaǵdaıda ıslamtanýshy mamandar men ımamdar atqaratyn negizgi jumystar ekenine basa nazar aýdardy.
2004-2011 jyldar aralyǵynda «Nur-Múbarak» ýnıversıtetin ıslamtaný mamandyǵy boıynsha barlyǵy 262 stýdent bitirgen. Olardyń ishinde 163-i, ıaǵnı 62,2%-y elimizdiń túrli aımaqtaryndaǵy meshitterde ımam nemese naıb-ımam qyzmetterin atqarady. 37 túlek, ıaǵnı bitirýshilerdiń 14,1%-y Qazaqstan musylmandary dinı basqarmasyna qarasty 9 medreselerde ustazdyq etýde.
Qazir ýnıversıtette 638 stýdent dinı bilim alýda. Olarǵa 53 qazaqstandyq jáne 17 egıpettik oqytýshylar dáris beredi. Professorlyq-oqytýshylar quramynda 6 ǵylym doktory, 21 - PhD doktory jáne 16 ǵylym kandıdattary bar. Ýnıversıtettiń ıslamtaný jáne arab fılologııasy fakýltetterindegi oqý úderisi «ıslamtaný», «dintaný», «shet tili», «aýdarma isi» mamandyqtary boıynsha júrgiziledi. «Shetel fılologııasy» jáne «dintaný» mamandyqtary boıynsha magıstratýra ashylǵan. Ýnıversıtet túlekterine memlekettik úlgidegi dıplom beriledi.
«Joǵary bilim alýǵa aqy tóleý úshin bilim berý grantyn berý týraly erejege» sáıkes QR Bilim jáne ǵylym mınıstrligi «ıslamtaný» mamandyǵy boıynsha joǵary bilikti kadrlardy daıarlaý úshin 2011 jyly 100 grant, 2012 jyly 128 grant bóldi. 2012-2014 jyldarǵa arnalǵan respýblıkalyq bıýdjet arqyly «ıslamtaný» mamandyǵyna 2013 jylǵa - 150 grant, 2014 jylǵa 200 grant bólý qarastyrylǵan. Sóıtip, 2014-2015 oqý jylynyń basynda ýnıversıtette joǵary dinı bilim alatyn stýdentterdiń kópshiligi memlekettik granttarmen tolyq qamtamasyz etiletin bolady.
Egıpet tarapynyń ótinishi boıynsha Qamqorshylar keńesi ýnıversıtettiń ataýyn «Nur» Qazaq-egıpet ıslam ýnıversıteti dep ózgertti. Sonymen qatar úkimetaralyq kelisimniń birinshi babyn iske asyrý maqsatynda jáne Qazaqstan Respýblıkasynyń zańnamasyna sáıkes egıpet tarapynyń qarajatyna salynǵan ýnıversıtettiń ǵımarattary qazaq tarapyna syı retinde tabys etildi. Sondaı-aq Qamqorshylar keńesi ýnıversıtetke qurylymdyq ózgerister engizip, «Din negizderi jáne ıslam ýaǵyz-nasıhaty», «Sharıǵat», «Arab fılologııasy jáne ıslam órkenıeti» atty úsh fakýltetti ashý týraly sheshim qabyldady. «Nur» Qazaq-egıpet ıslam ýnıversıtetinde Ábý Hanıfa atyndaǵy ǵylymı-zertteý ortalyǵy da jumys isteıtin bolady.
