Nur Kapital baǵdarlamasy: Munaıly aýdanynda 10 joba iske aspaq

Jıynǵa oblys ákimi Eraly Toǵjanov pen Óńirlik úılestirý keńesiniń músheleri, basqarma basshylary men BAQ ókilderi qatysty.

Atalǵan jobalardyń jalpy quny 427 mln, nesıelendirý quny 239 mln teńgeni quraıdy. Jobalar iske qosylǵanda 154 jumys orny qurylýy josparlanǵan. Usynylǵandar qatarynda  3 joba óndiris (qaıta óńdeý), 2 joba aýyl sharýashylyǵy, 5 joba qyzmet kórsetý (bilim berý, sport, hımııalyq tazalaý) salalaryna baǵyttalǵan.  Qazirgi tańda atalmysh jobalar óz jumystary men qyzmetterin bastap ketýge daıyn.

Solardyń biri -  «Shaqpaq (rafınadtalǵan) qant shyǵaratyn tseh» jobasy. Ol jeke kásipker, kóp balaly ana Ryshanym Qabdyǵalıǵa tıesili. Tseh Mańǵystaý oblysy, Munaıly aýdany, Basqudyq aýyldyq okrýginde ornalasqan. Ǵımarat aýmaǵynyń jalpy kólemi - 300 sharshy metr. Jobalyq qýattylyǵy - táýligine 5300 kg (5,3 tonna). Atalǵan jobanyń quny - 48 mln teńge.

«Tseh Munaıly aýdanynyń 15 turǵynyn jumyspen qamtyp, Mańǵystaý oblysy boıynsha qant baǵasyn biraz arzandatýǵa múmkindik týǵyzatyn bolady. Kásipkerdiń esepteýi boıynsha, tasymaldaý men logıstıkaǵa shyǵyn shyqpaıdy. Eger qazirgi naryqta 1 kg qanttyń ortasha quny - 330 teńgeni qurasa, nesıe berilgen jaǵdaıda Mańǵystaýdaǵy «Shaqpaq qant tsehy» shyǵaratyn qant quny 30-40 paıyzǵa arzanǵa túsip, 1 kg qanttyń baǵasy - 230 - 250 teńgeni quraıtyn bolady. ıAǵnı, Mańǵystaý aımaǵynyń turǵyndary úshin qant qoljetimdi baǵamen satylady», - dedi Munaıly aýdanynyń ákimi Nurlan Tájibaev.  

Sonymen qatar, Munaıly aýdanynan  «Kaspıı» ıodtalǵan as tuzy, jabyq bazary bar kókónis, jemis jıdek saqtaıtyn qoıma, Qumblok óndirý shaǵyn zaýyty, Qurttardy ósirý jáne qunarly topyraq óndirý (bıogýmýs) fermasy, Hımııalyq tazalaý jáne kir jýý kesheni, kóp salaly jekemenshik sport kesheni jáne jekemenshik balabaqshalar jobasy tanystyryldy.