Nur-Cultanda Janýarlardy qorǵaý jónindegi keńes óz jumysyn bastady
Keńes músheleriniń birinshi jınalysyna qala ákimi orynbasary Nurlan Soltambekov tóraǵalyq etip, onda mektep baǵdarlamasyna janýarlarǵa qamqorlyq tanytýdy nasıhattaıtyn «Meıirimdilik sabaqtaryn» uıymdastyrý, janýarlardy kastratsııalaý jáne zararsyzdandyrý, ıtter men mysyqtarǵa arnalǵan baspanany senimgerlik basqarýǵa berý jáne aqparattandyrý jumystaryn kúsheıtý máseleleri qaraldy.
Shara barysynda janýarlar quqyǵyn qorǵaýshylar, veterınarııa qyzmetkerleri, aýyl sharýashylyǵy ýnıversıtetteriniń oqytýshylary jáne tájirıbeli veterınarlar óz usynystaryn ortaǵa saldy.
«Azamattar janýarlardy qorǵaýǵa, olarǵa meıirimdilikpen qaraýǵa bala kúninen úırenýi kerek. Biz ótken jyly mektepterdegi ashyq sabaqtarǵa qatysyp, janýarlar týraly paıdaly aqparat berdi, ıttermen qalaı qarym-qatynas jasaý kerektigin kórsettik. Bul, balalarǵa unady. Aldaǵy ýaqytta osyndaı sabaqtar ashyq sabaqtar negizinde emes, mektep baǵdarlamasyna ense eken deımiz», - dedi «INUCOBO» janýarlardy qorǵaý qaýymdastyǵynyń prezıdenti Lılııa Sarsenova.
Munymen qosa, otyrysta qańǵybas ıtter men mysyqtar sanynyń kóbeıýi sóz boldy. Memlekettik mekeme qyzmetkerleriniń aıtýynsha, buǵan óz janýarlaryna jaýapsyzdyq tanytyp, olardy kóshede qaldyryp ketetin azamattar sebepshi. Bul máseleniń aldyn oraý úshin qalada 2017 jyldan beri zararsyzdandyrý sharalary júrgizilýde.
«Elordada zararsyzdandyrý boıynsha 2018 jyly – 500 janýar, 2019 jyly – 1800 janýar, al 2021 jyly 2500 ıt pen 1500 mysyqty zararsyzdandyrý josparlanyp otyr», - dep qosty Qalalyq orta sapasy jáne baqylaý basqarmasynyń basshy orynbasary Aıdyn Moldaǵalıev.
Otyrys nátıjesi boıynsha, aldaǵy ýaqytta halyq ishinde janýarlarǵa jaýapkershilik tanytýǵa qatysty aqparattandyrý jumystary kúsheıtilip, «úı janýarlarynyń ıdentıfıkatsııasy» boıynsha derekter bazasyn odan ári júrgizý men onda anyqtalǵan kemshilikterdi joıý jumystary atqarylatyn bolady.
Aıta keteıik, Keńes músheleri mundaı otyrysty aıyna bir ret uıymdastyrmaq.
