«Nur Astana» ortalyq meshiti Ramazan aıynyń árbir kúni 500 kisige arnap aýyzashar dastarqanyn jaıady
ASTANA. Tamyzdyń 10-y. QazAqparat /Gúlmıra Álıakparova/ - Astana qalasyndaǵy «Nur Astana» ortalyq meshitinde Ramazan aıynyń árbir kúni 500 kisige arnap aýyzashar dastarqany jaıylady.
Bul týraly QazAqparat tilshisine bergen suhbatynda Qazaqstan musylmandary Dinı basqarmasynyń naıb múftıi, «Nur Astana» meshitiniń bas ımamy Qalıjan qajy Zańqoev málim etti.
«Ramazan aıynyń alǵashqy kúninen bastap, sońǵy kúnine deıin «Nur Astana» ortalyq meshitinde 500 kisige arnalyp aýyzashar dastarqany jaıylady.Mundaı kóp kisige aı boıy Astana qalasynda buryn-sońdy aýyzashar berilmegen. Aýyzashar berýdi saýapty dep ataýymyzǵa tolyqtaı negiz bar. Óıtkeni bul jaıynda hadıste: «Oraza ustaǵan kisige aýyz ashtyrǵanǵa oraza ustaǵan kisiniń saýabyndaı saýap jazylady. Budan oraza ustaǵan kisiniń saýaby kemimeıdi», delingen. Sondyqtan aýyz ashtyrýdyń saýabynan úmit etilip, osyndaı ıgi qadam jasalýda. Jaýapty dep otyrǵanymyz, osy dastarqanǵa aýyz bekitken adamdardy jınaý máselesi. Sol sebepti oraza ustaǵan elorda turǵyndary men qonaqtaryn Ramazan aıynyń ár kúni «Nur Astana» ortalyq meshitinde beriletin merekelik aýyzashar dastarqanyna shaqyramyz!», - deıdi Q.Zańqoev.
Eske salaıyq, «Nur Astana» ortalyq meshiti 2005 jyly paıdalanýǵa berildi. Meshit Katar memleketiniń Ámiri sheıh Hamad bın Halıfa ál-Sánıdyń qaıtarymsyz syı retinde bólgen qarjysyna turǵyzyldy. Meshittiń jobasyn lıvandyq sáýletshi Charlz Hafıza jasasa, qurylysynyń bas merdigeri - Túrkııanyń «Pasıner» kompanııasy. Іshki árlendirý jumystaryna otandyq sáýletshiler men dızaınerler atsalysyp, jazýlar ıslam kallıgrafııasy men arab grafıkasyna sáıkes órnektelgen. Bezendirý jáne kórkemdeý jumystarynyń avtory Qazaqstan Sýretshiler odaǵynyń múshesi Ǵazız Eshkenov.
3930 sharshy metr alańǵa ornalasqan meshitte bir mezgilde 10 myń adam namaz oqı alady. Joǵarǵy qabatta áıel kisilerge arnalǵan 2 myń oryndyq balkon bar.
Meshit janynda, sondaı-aq oqý bazasy tolyqtaı jabdyqtalǵan 100 shákirtke arnalǵan «Astana» medresesi bar. Elordamyzda tuńǵysh ashylǵan bul dinı oqý orny búginde resmı tirkelip, óz jumysyn oıdaǵydaı atqarýda.
