«Nur Astana» Ortalyq meshiti Oraza aıt kúnderi 2 myń otbasyna áleýmettik kómekter kórsetýde
STANA. Qyrkúıektiń 9-y. QazAqparat /Gúlmıra Álıakparova/ - «Nur Astana» ortalyq meshiti Oraza aıt merekesi qarsańynda elordadaǵy áleýmettik jaǵdaıy nashar otbasylar men stýdent jastarǵa azyq-túlikteı jáne qarjylaı kómek kórsete bastady.
Bul týraly búgin QMDB-nyń naıb múftıi, «Nur Astana» ortalyq meshitiniń bas ımamy Qalıjan qajy Zańqoev málimdedi.
Q.Zańqoevtyń aıtýynsha, «Nur Astana» ortalyq meshitiniń bastamasymen uıymdastyrylyp otyrǵan bul ıgi is, aıt kúnderi adamdarǵa merekelik kóterińki kóńil-kúı syılaý maqsatynda qolǵa alynyp otyr.
Áleýmettik járdem Esil, Almaty jáne Saryarqa aýdandary ákimdikterinen alynǵan tizim boıynsha 2 myń otbasyǵa, onyń ishinde joǵary oqý oryndarynyń stýdentterine kórsetiledi. Onyń 1 myńyna azyq-túlik qaltalary úılerine búginnen jetkizile bastady. Qalǵan 1 myńyna qarjylaı qoldaýlar erteńnen bastap taratyla bastaıdy.
Muqtaj jandarǵa túrli kómekter buǵan deıin de kórsetilip kelgenimen, adamdardyń mundaı sany Astana qalasynda alǵash qamtylyp otyr. Ramazan aıy boıy jınalǵan pitir sadaqalardy osyndaı ıgi, qaıyrymdy isterge jumsaýdyń oryndy ekendigin aıtqan Q.Zańqoev, buǵan «Nur Astana» ortalyq meshiti men Sádýaqas qajy Ǵylmanı meshitinde jınalǵan pitir sadaqadan 1,5 mıllıon teńge bólingendigin atap ótti.
Eske sala keteıik, keshe ǵana órmektiń júzinen aýǵan Ramazan aıynda «Nur Astana» meshiti aı boıy jamaǵatqa barynsha joǵary deńgeıde qyzmet kórsetý úshin aıanyp qalǵan joq. Kúndelikti 500 kisige arnap aýyzashar dastarhanyn jaıyp, qala meshitterine taraýıh namazyna kelgen jamaǵatty 5 baǵyt boıynsha avtobýstar aı boıy tegin tasyp otyrdy. El ıgiligi úshin atqarylyp jatqan isterge Bas shahardyń turǵyndary men qonaqtary dán rıza.
