«Nur Astana» ortalyq meshiti Máýlit keshine shaqyrady
ASTANA. 8 aqpan. QazAqparat - Elordadaǵy «Nur Astana» ortalyq meshiti jyldaǵy dástúr boıynsha 18 aqpanda, saǵat 10.00-de Astana qalasyndaǵy Kongress-Holl saraıynda ótetin Paıǵambarymyz Muhammedtiń (s.a.s.) týǵan kúniniń qurmetine arnalǵan «Qosh keldiń, Máýlit!» atty merekelik keshke shaqyrady.
«Shara barysynda súıikti Paıǵambarymyzdyń (s.a.s) ómirbaıany jáne ósıetteri jaıynda nasıhattar aıtylady. Paıǵambarǵa (s.a.s.) arnalyp arabsha salaýat oqylady. Taqyrypqa saı ıláhı ánder shyrqalyp, taǵylymdy beıne materıaldar kórsetiledi»,-deıdi uıymdastyrý alqasy.
Keshtiń baǵdarlamasyna toqtalatyn bolsaq, kópshilik nazaryna «Súıinshi, Allanyń sońǵy Elshisi keldi!» atty beıne materıal usynylady. Munymen qosa, Qasıetti Quran oqylyp, Máýlittiń mańyzdylyǵy, ony atap ótýdegi artyqshylyǵy jáne Paıǵambardyń (s.a.s) ónegeli ómir joly jaıynda ýaǵyzdar aıtylady.
Keshti Astana qalasy ákimdiginiń qoldaýymen «Nur Astana» ortalyq meshiti uıymdastyryp otyr.
