«Nur Astana» meshitinde aqsaqaldar mektep túlekterin sabyrǵa shaqyrdy
ASTANA. QazAqparat - Búgin «Nur Astana» ortalyq meshitinde mektep bitirýshi túlekterge arnalǵan «Jolyń bolsyn, jas túlek!» atty rýhanı kezdesý ótti. Bul sharaǵa qala mektepteriniń túlekteri shaqyryldy, dep habarlaıdy QazAqparat.
«Mektep bitirgennen keıin, bizdiń jastarymyzdyń aldynda úlken emtıhan turady. Joǵary bilim alý úshin oqý ornynan túsý joldary emtıhannyń (UBT) nátıjesine baılanysty bolady. Sondyqtan bizdiń balalarymyz rýhanı nár alsyn, rýhanı tárbıe alsyn degen maqsatpen bıylǵy mektep túlekterin meshitke shaqyryp, aqsaqalǵa bata bergizip jatyrmyz. Sonymen qatar ózimizdiń tálimimizdi aıtyp, ata-analarǵa qurmet kórsetý áreketin jasaýǵa aqylymyzdy aıtamyz»,-dep toqtaldy QMDB-nyń naıb múftıi, Astana qalasynyń Bas ımamy Naýryzbaı qajy Taǵanuly.
Budan bólek ol balalardyń ózine qol jumsaýyna jol bermeý baǵytynda da tıisti túsindirý jumystary júrgizilip jatqandyǵyn jetkizdi.
«Bárimizge belgili, óz ómirine qastandyq jasaýshylar bar, onyń ishinde jastardy da baıqaýdamyz. Sondyqtan mektep bitirýshilerdiń aldynda turǵan emtıhany - bul ómirdiń sheshimi emes. Osyndaı emtıhan ómirde kóp bolady. Osy oraıda árbir emtıhanǵa daıyndalý kerek, sondaı-aq onyń nátıjesine sabyr ete bilý kerek»,-dedi Astananyń Bas ımamy mektep túlekterine qaratyp aıtqan sózinde. 
Bul turǵyda ol Ulttyq biryńǵaı testileý bilim jolyndaǵy bir baspaldaq ekenin, degenmen de UBT nátıjesi búgingi jarqyn ómirdiń sońǵy sáti emes ekenin túsindire kele, osy emtıhannyń nátıjesine sabyrmen qaraýǵa shaqyrdy. 
Aıta keteıik, elordanyń mektepterinen jınalǵan oqýshylar men muǵalimderge «Nur Astana» ortalyq meshiti tarapynan «Jastar arasynda radıkaldy ıdeologııa taralýynyń aldyn alý» atty aqparattyq-tanymdyq kitapsha, sonymen qatar «Jas túlekke nasıhat» atty arnaıy materıaldar taratyldy.
