Numbeo nusqasy boıynsha BAÁ men Andorra álemdegi eń qaýipsiz el atandy

ASTANA. KAZINFORM — 2025 jylǵa arnalǵan álemdegi eń qaýipsiz elder reıtınginde Birikken Arab Ámirlikteri (BAÁ) men Andorra kósh bastap tur. Bul týraly AZÁRTADJ sheteldik buqaralyq aqparat quraldaryna silteme jasap habarlady.

Keltirilgen málimetterge sáıkes, bıylǵy reıtıngte jetekshi oryn alǵan elder quqyq qorǵaý júıesiniń myqtylyǵymen, saıası turaqtylyqpen jáne qylmys deńgeıiniń tómendigimen erekshelenedi. Bul faktorlar olardy halyqaralyq ınvestorlar, shetelde jumys isteıtinder (ekspattar) jáne týrıster úshin yńǵaıly.

Eń qaýipsiz 5 el (qaýipsizdik ındeksi balmen):

1. BAÁ – 85,2

2. Andorra – 84,8

3. Katar – 84,6

4. Taıvan – 83

5. Oman – 81,8

Eń qaýipti 5 el:

Bul elderde saıası turaqsyzdyq, quqyq qorǵaý júıesiniń álsizdigi jáne qylmystyń joǵary deńgeıi baıqalady:

• Papýa – Jańa Gvıneıa – 19,3

• Venesýela – 19,5

• Gaıtı – 19

• Aýǵanstan – 24,8

• Ońtústik Afrıka – 25,4

Atalǵan elderdiń turǵyndary men týrısteri urlyq, shabýyl jáne qarýly zorlyq-zombylyqtyń joǵary qaýpine jıi shaǵymdanady.

AQSh pen Ulybrıtanııa:

• AQSh – 50,8 ball, 91-oryn

• Ulybrıtanııa – 51,76 ball, 86-oryn

Osy eki elde damyǵan quqyqtyq júıe men qoǵamdyq qaýipsizdikke arnalǵan úlken bıýdjettik shyǵyndar bolǵanymen, sońǵy bir jylda qylmystyń artýy, ásirese iri qalalarda, halyqtyń polıtsııaǵa degen seniminiń tómendeýi jáne AQSh-ta atys qarýyna qatysty shabýyldardan qorqý sebepti qaýipsizdik ındeksi tómendegen.

Numbeo qaýipsizdik ındeksi — bul paıdalanýshylar óz elderindegi qaýipsizdik deńgeıin qanshalyqty jaıly sezinetinin baǵalaıtyn kórsetkish. Indeks túrli faktorlarǵa, sonyń ishinde qylmys deńgeıi men jalpy qaýipsizdik qabyldaýyna negizdeledi. Bıylǵy reıtıngke 146 memleket engen.

Aıta keteıik, Birikken Arab Ámirlikteri 2030 jylǵa deıin 100 mıllıon mangr aǵashyn otyrǵyzý boıynsha aýqymdy ekologııalyq bastamany qolǵa aldy.