Núkenovany qylqyndyrý belgileri bar - sarapshy
ASTANA. KAZINFORM – Eks-mınıstr Qýandyq Bıshimbaevtyń soty jalǵasyp jatyr. Sot-medıtsınalyq sarapshy Tahır Halımnazarov Saltanattyń ólimine sebep bolǵan bas jaraqattaryn tizbektep berdi.
Ol marqumnyń bet-júzinde bolǵan jaraqattardy manekenge salyp kórsetti. Sarapshy bul jaraqattar ózge adamnyń qolynan paıda bolǵanyn aıtty.
– Esi saý adam ózdiginen mundaı jaraqat almaıdy. Bıikten qulasa bir jón, jerde turǵan adam basyn jerge soǵyp, mundaı zaqym ala almaıdy, - dedi ol.
Sarapshy Núkenovanyń moınynda qylǵyndyrý belgileri bar bolǵanyn atap ótti.
«Ony soqqylardan keıin qylqyndyrǵan ba?» - dep surady sýdıa Aıjan Kólbaeva.
Halımnazarov «ıá» dep jaýap berdi.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty.
Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi.
11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti.
Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti.
29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-keris qalaı bastalǵany týraly málimetter aıtty jáne marqumnyń bet-álpeti kógergen sýretti kórsetti.
1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.
Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.
