«NU páterinen qarý tabyldy»: Saıasat Nurbek oqıǵaǵa qatysty pikir bildirdi
ASTANA. KAZINFORM – QR Ǵylym jáne joǵary bilim mınıstri Saıasat Nurbek Nazarbaev ýnıversıtetiniń páterinde qarý saqtaǵan sheteldiktiń ustalýy jónindegi aqparatqa qatysty málimdeme jasady.
Onyń sózinshe, «qarý-jaraq arsenaly» jaıynda taraǵan aqparat jalǵan.
– Bul másele jóninde polıtsııa málimet taratty. Birinshiden, olar Nazarbaev ýnıversıtetiniń qyzmetkerleri emes. Ekinshiden, tabylǵan zat atys qarýy emes. Qatelespesem, XVII ǵasyrǵa tıesili tarıhı jádiger, – dedi Saıasat Nurbek Májiliste ótken baspasóz máslıhatynda.
Sonymen qatar, onyń aıtýynsha, sheteldik azamattar NÝ jalǵa alǵan páterde turmaıdy. Ondaı baspana JOO qyzmetkerlerine arnalǵan.
– Avtonomdy bilim berý uıymy retinde Nazarbaev ýnıversıtetiniń máseleleri jeke zańmen qaralady. Mınıstrlik ondaı sharýashylyq isterge aralaspaıdy, – dedi mınıstr.
Buǵan deıin habarlaǵanymyzdaı, tekseris júrgizýge turǵyndardyń biriniń páterge kúmándi zat kirgizdi degen shaǵymy túrtki bolǵan.
Oqıǵa ornyna jedel jetken polıtsııa qyzmetkerleri tekserý jumystaryn júrgizdi.
Quzyrly organnyń málimetinshe, jáshiktiń ishinde tarıhı ári mádenı qundylyǵy bar antıkvarlyq qarý úlgileri bolǵan. Sarapshylardyń qorytyndysyna sáıkes, bul zattar zamanaýı atys qarýyna jatpaıdy jáne turǵyndarǵa eshqandaı qaýip tóndirmeıdi.
