Novosibir - Pavlodar áýe reısterine qazirdiń ózinde bılet satylyp jatyr
PAVLODAR. QazaAqparat - 2018 jyly iske qosylatyn baǵyt boıynsha áýe bıletteri qazirdiń ózinde satylyp jatyr, dep habarlaıdy «QazAqparat» HAA tilshisi.
Novosibirden Pavlodarǵa jáne keri baǵytta aptasyna eki márte ushaq qatynaıtyn boldy. Bıletter barlyq áýe bıletterimen aınalysatyn agenttikterde satylyp jatyr. Kez kelgen saıtqa kirip qaraýǵa bolady. Ushaqtar seısenbi jáne demalys kúnderiniń birinde ushady,-dedi «Aeroport Pavlodar» AQ basqarma tóraǵasy Marat Shıshov.
Onyń aıtýynsha, bılet baǵasy 30 000 teńgeden tómen bolmaıdy. Tikeleı reısterdiń keńsesi Novosibir qalasynda ornalasqan «S7 Airlines» áýe kompanııasy arqyly júzege asyrmaq.
Úlken áýe kemeleri shyǵyndy aqtamaıtyndyqtan, atalǵan baǵytqa 80 oryndyq shaǵyn «Embraer» ushaqtary jiberiledi.
