Novosibir opera jáne balet teatry «Astana Opera» sahnasynda óner kórsetedi
ASTANA. QazAqparat - Astana Opera» sahnasynda Novosibirlik opera jáne balet teatrynyń trýppasy alǵash ret óner kórsetedi.
Tek bir kún, 28 qazanda elorda turǵyndary R. Petıdiń «Karmen» jáne E. Lıangtiń «Tún ishindegi sybyr» baletterin tamashalaı alady, sondaı-aq gastrolmen kelgender Novosibir operasynyń juldyzdary qatysatyn mazmundy kontserttik baǵdarlama usynady.
«Dostyǵymyz jarasqan memlekettiń astanasyna sońǵy on jyldan beri alǵashqy ret barǵaly otyrmyz. Biz bir-birimizge aıtarlyqtaı jaqyn ornalasqanbyz, degenmen eki iri teatr ujymy - «Astana Opera» men Novosibirlik opera jáne balet teatrynyń kezdespegeni olqylyq boldy jáne biz munyń ornyn toltyramyz, árıne. Meniń oıymsha, bizdiń bir-birimizge degen qyzyǵýshylyǵymyz uzaǵynan bolady», - deıdi NMAOBT dırektory B.M. Mezdrıch.
Bir aktiden turatyn «Tún ishindegi sybyr» baletinde bıleıtinder: Anna Odıntsova, Vera Sabantseva, Svetlana Svınko, Ilıa Golovchenko, Ivan Oskorbın jáne Roman Polkovnıkov. Novosibirlik opera jáne balet teatrynyń dırektory alǵashqy saparlarynda Astanamen tanysyp qaıtatyndaryn aıtady. «Biz kórermenmen, Astana qalasynyń teart súıer qaýymymen tanyssaq dep edik, teatrdy da kórip, onyń tehnıkalyq, kásiptik turǵydan múmkindikterimen, ózimiz qandaı jaǵdaıda jumys jasaıtynymyzben tanysyp qaıtsaq degen oıymyz bar. Biz teatr basshylyǵymen eki jaqty qyzyqtyratyn suraqtardy talqylasaq, bolashaqta júzege asatyn túrli baǵyttaǵy eki jaqty alys-beris jaıly kelissek dep edik. Sol sebepti biz balet ujymyn da, opera solıstterin de ala keldik. Ókinishke oraı bul joly orkestr men horymyzdy ákele almaımyz, degenmen kelissóz barysynda gastrolge tolyqqandy spektaklder ákelý jaıyn qozǵamaqshymyz», - deıdi Borıs Mezdrıch.
Reseılik trýppa tek Novosibirlik opera jáne balet teatrynyń sahnasynda ǵana tamashalaýǵa bolatyn súzgiden ótken repertýarynyń «hıttaryn» - R. Petıdiń «Karmen» baleti, J. Bızeniń mýzykasyn pash etedi. Hozeniń rolinde oınaıtyn Igor Zelenskıı - balet trýppasynyń kórkemdik jetekshisi, Reseıdiń Halyq ártisi, Karmenniń rolinde - Reseıdiń Halyq ártisi, «Altyn Maska» Ulttyq teatrlyq syılyǵynyń ıegeri, Halyqaralyq konkýrstardyń laýreaty jáne dıplomanty Anna Jarova.
