Novosibir-Nur-Sultan baǵytyndaǵy jańa reıs iske qosyldy
NUR-SULTAN. QazAqparat - Reseılik S7 áýe kompanııasy Qazaqstanǵa qatynaıtyn reısterdiń geografııasyn keńeıtti. 7 mamyr kúni Nursultan Nazarbaev halyqaralyq áýejaıy Novosibirden kelgen alǵashqy ushaqty qarsy aldy, dep habarlaıdy «QazAqparat» HAA.
Halyqaralyq áýejaıdyń avıatsııalyq marketıng bóliminiń bastyǵy Elena Dıýgaıdyń aıtýynsha, jańa reıs jolaýshylarǵa qomaqty qarajat únemdeýge múmkindik beredi, sondaı-aq, Qıyr Shyǵystaǵy jolaýshylar tasymaldaıtyn reıstermen yńǵaıly baılanysqa ıe.
«Biz bul kúndi uzaq kúttik. Nursultan Nazarbaev halyqaralyq áýejaıy úshin S7 áýe kompanııasy - jańa tasymaldaýshy. Sol sebepti alǵashqy ushaqty «sý arkasymen» qarsy aldyq, bul avıatsııa dástúri», - dedi ol.
Nur-Sýltan qalasynan ketý ýaqyty seısenbi jáne senbi kúnderi jergilikti ýaqyt boıynsha 17:25 shamasynda, al 28 mamyrdan bastap beısenbi kúnderi reıster oryndalady. Ushý ýaqyty - bir jarym saǵat.
«Men áýeli Novosibirge, sodan keıin Magadanǵa ushamyn. Kúıeýim Magadanda bolǵandyqtan bul baǵytta jıi ushamyn. Kompanııa óte qolaıly ushý ýaqytyn usynyp otyr. Buryn 12 saǵat kútýge týra keletin. Qazir nebary úsh saǵat. Bul men úshin óte yńǵaıly. Jáne eń mańyzdysy - chemodandy alyp júrýdiń qajeti joq, júk birden Magadanǵa ushyp kete beredi», - dedi qýanyshymen bólisken Anastasııa Zaharenkova.
Ekıpaj komandıri Petr Şelkanovtyń aıtýynsha, áýe kemesiniń syıymdylyǵy - 78 jolaýshy. Ushýlar Embraer 170 áýe kemesimen júzege asyrylady.
