Novoselovka aýylynda órt sóndirý beketi ashyldy - Aqmola oblysy
KÓKShETAÝ. QazAqparat - Aqmola oblysynyń Shortandy aýdanynda órt sóndirý beketi ashyldy, dep habarlaıdy QazAqparat tilshisi.
Novoselovka aýylynda paıdalanýǵa berilgen nysannyń ashylý saltanatyna aýdan ákimi Gúlnur Ánýárbekova men Aqmola oblystyq TJD basshysynyń orynbasary, azamattyq qorǵanys polkovnıgi Manarbek Shapaǵatov qatysyp, quttyqtaý sóz sóıledi.
Eske sala keteıik, Aqmola oblysynda ótken jyly 919 órt oqıǵasy bolsa, onyń 521 aýyldyq eldi mekenderde tirkelgen. Tilsiz jaýdyń saldarynan 63 bas úı janýary ólip, 196 mıllıon 567 myń teńgege materıaldyq shyǵyn keltirilgen.
Novoselovka aýylynda ashylǵan órt beketin ustap otyrýǵa jergilikti «Novoselovka» JShS óz moınyna alyp otyr. Beket 2 órt sóndirý kóligi, órt-tehnıkalyq jabdyqtar jáne ottan qorǵaıtyn arnaıy kıimmen qamtamasyz etilgen.
