Novorossıısk portyndaǵy oqıǵa qazaqstandyq munaı eksportyna áser etken joq - mınıstrlik

ASTANA. KAZINFORM – Qazaqstan Respýblıkasy Energetıka mınıstrligi Novorossıısk portyndaǵy «Shesharıs» munaı quıý termınalynda bolǵan oqys oqıǵaǵa qatysty resmı málimdeme jasady.

Mınıstrlik málimetinshe, qolda bar aqparatqa sáıkes, atalǵan termınaldaǵy jaǵdaı qazaqstandyq munaı óndirýshi kásiporyndardyń óndiristik kórsetkishterine keri áserin tıgizbegen.

- Otandyq munaı óndirý jáne ony eksporttaý qalypty rejımde júzege asyrylyp jatyr. Qazaqstan munaıyn jetkizýge paıdalanylatyn eksporttyq ınfraqurylym jumysynda irkilister men buzýshylyqtar tirkelmegen, - delingen aqparatta.

Energetıka mınıstrligi jaǵdaıdy beıindi uıymdarmen jáne ınfraqurylym operatorlarymen ózara is-qımyl sheńberinde turaqty baqylaýda ustap otyrǵanyn málimdedi.

Aıta keteıik, Taıaý Shyǵystaǵy jaǵdaıǵa baılanysty Saýd Arabııasyndaǵy eń iri munaı óńdeý zaýyty jumysyn toqtatty.