«Novaıa volna-2015»: Alǵashqy kúnniń nátıjesi boıynsha qazaqstandyqtar úzdik úshtik qatarynda
ALMATY. QazAqparat - Keshe Máskeý ýaqytymen saǵat 22:50-de «Novaıa volna 2015» jas oryndaýshylar baıqaýynyń alǵashqy kúni ashyldy.
Bıylǵy jyly baıqaýǵa Qazaqstannyń atynan birden eki qatysýshy: ánshi Ademi men VoiceKZ toby shyǵyp otyr.
Kesh qorytyndylary boıynsha bizdiń otandastyrymyz úzdik oryndaýshylar úshtigine kirdi. Atap aıtqanda, Ademi 87 balmen ekinshi orynda, al VoiceKZ toby bir ball aıyrmashylyqpen úshinshi orynda ornalasqan.
Baıqaýdyń birinshi kúnindegi taqyryby tanymal kınofılmder men serıaldardyń ánderi bolǵan.
Dástúr boıynsha, keshti Novaıa volna baıqaýynyń mýzasy Alla Pýgacheva ashty. Keshtiń arnaıy qonaqtarynyń arasynda Eros Ramazottı boldy, ol Anı Lorakpen qosylyp, "Piu cue puoi"eskirmeıtin hıtin oryndady.
Bıylǵy jyly baıqaýdyń alǵash ret Sochı qalasynda ótip jatqanyn atap ótý kerek.
«Novaıa volna» tanymal mýzyka jas oryndaýshylarynyń halyqaralyq baıqaýy alǵash ret 2002 jyly ótkizilgen. Baıqaýdy qos kompozıtor Igor Krýtoı men Raımond Paýls uıymdastyrǵan.
Almatylyq Ademi (shyn esimi Dınara Qaıyrova) - halyqaralyq qatynastar jáne halyqaralyq týrızs salasyndaǵy joǵary kásibı maman. Varnadaǵy (Bolgarııa) Halyqaralyq mýzykalyq baıqaýynda Birinshi syılyqtyń laýreaty, Reseıde («Reseı juldyzy»), Ispanııada laýreat, sondaı-aq Sochıdegi «Eýropa úmitteri» Halyqaralyq mýzykalyq baıqaýynyń Ekinshi syılyǵynyń laýreaty. Malta araly, Avstrııa, Germanııa, Italııa, Chehııada túrli halyqaralyq mýzykalyq festıvaldardyń qatysýshysy.
