Novak Djokovıch jyldyń qorytyndy týrnırinde oınaýdan bas tartty

ASTANA. KAZINFORM — «Úlken dýlyǵa» týrnırleriniń 24 dúrkin chempıony, álemniń 5-raketkasy Novak Djokovıch Týrın qalasynda (Italııa) 9-16 qarashada ótetin ATP qorytyndy týrnırine qatyspaıtyn boldy.

Novak Djokovıch senbi kúni Afıny (Grekııa) ATR 250 jarysynyń fınalynda ıtalııalyq Lorentso Mýzettıdi 4:6, 6:3, 7:5 esebimen tize búktirdi. Sóıtip ol kásibı jolyndaǵy 101-tıtýlyn jeńip aldy. 

Tennısshi jyldyń basty jarysynyń birinen bas tartýynyń sebebi – alǵan jaraqattarynyń saldarynan dep túsindirdi. 

- Men Týrındegi týrnırdi onda barymdy salý úshin asyǵa kúttim. Biraq Afınydaǵy fınaldan keıin jaraqatymnyń jalǵasýyna baılanysty jarysqa qatysa almaıtynymdy ókinishpen habarlaımyn. Meniń oıynymdy kórgisi kelgen jankúıerlerden shyn júregimmen keshirim suraımyn, olardyń qoldaýy men úshin asa mańyzdy. Týrnırge qatysýshylardyń bárine sáttilik tileımin. Kortqa qaıta shyǵatyn kúnimdi shydamsyzdana kútemin, - dep jazdy Djokovıch áleýmettik jelidegi paraqshasynda.

Týrınge N.Djokovıchtiń ornyna ATR chempıondyq kestesinde 9-orynda turǵan L.Mýzettı baratyn boldy. Eger segiz úzdik tennısshiniń taǵy bireýi oınaı almaıtyn bolsa, onda onyń ornyna qazaqstandyq Aleksandr Býblık shaqyrtylady. 

Eske sala keteıik, budan buryn Rybakınanyń WTA qorytyndy týrnırin utqan alǵashqy azııalyq tennısshi atanǵanyn jazǵan edik. 

Sondaı-aq Qasym-Jomart Toqaev tennısshi Elena Rybakınany jeńisimen quttyqtady.