Novak Djokovıch tennıs tarıhynda rekord ornatty
ASTANA. QazAqparat – «Úlken dýlyǵa» týrnıriniń 22 dúrkin chempıony, serbııalyq Novak Djokovıch tennıs tarıhynda rekord ornatty, dep habarlaıdy QazAqparat tilshisi.
Shampionat.com saıty málim etkenindeı, N.Djokovıch álemniń birinshi raketkasy retinde 378-inshi aptasyn ótkizýde.
Serbııalyq sportshy bul jóninen germanııalyq, 377 apta boıy reıtıngide kósh bastaǵan Shteffı Graftyń kórsetkishinen asyp tústi. Bul rekord 1997 jyldan beri jańartylmaǵan edi.
Novak Djokovıch óziniń sońǵy jarysy – Aýstralııa ashyq chempıonatynda fınalda álemniń 4-raketkasy, grekııalyq Stefanos Tsıtsıpasty 6:3, 7:6 (7:4), 7:6 (7:5) esebimen utqan edi.
N.Djokovıch 28 aqpan kúni Dýbaıdaǵy dodada alǵashqy aınalymda chehııalyq Tomash Mahachpen kezdesedi.
Eske sala keteıik, budan buryn qazaqstandyq jas tennısshiniń Túrkııadaǵy týrnırdiń chempıony atanǵanyn jazǵan bolatynbyz.
Sondaı-aq elordadaǵy halyqaralyq týrnırdiń irikteý saıysynda 5 qazaqstandyq tennısshi oınaıdy.
