Novak Djokovıch – Laureus nusqasy boıynsha jyldyń úzdik sportshysy
ASTANA. KAZINFORM – Laureus World Sports Awards nusqasy boıynsha tennısshi Novak Djokovıch 2023 jyldyń úzdik sportshysy atandy. Marapattaý rásimi Ispanııa astanasy Madrıd qalasynda ótti.
Úlken dýlyǵanyń 24 dúrkin chempıony Djokovıch úshin bul marapat onyń mansabyndaǵy besinshi júldesi. Ol buǵan deıin 2012, 2015, 2016 jáne 2019 jyldary jeńimpaz atanǵan bolatyn.
Bul marapatqa Novak Djokovıchden bólek, Lıonel Messı (fýtbol), Maks Ferstappen (Formýla-1), Mondo Dıýplantıs (jeńil atletıka), Erlıng Holand (fýtbol) jáne Noa Laıls (jeńil atletıka) úmitker retinde tirkelgen edi.
2023 jyly Laýreýs syılyǵyn Lıonel Messı, 2022 jyly Maks Verstappen, 2021 jyly Rafael Nadal jeńip alǵan bolatyn. Al bul syılyqty kóp alǵan sportshy – Rodjer Federer (4 ret).
Eske sala keteıik, 2023 jyly Laureus syılyǵyna úmitkerlerdiń qatarynda qazaqstandyq tennısshi Elena Rybakına da boldy. Ol «Jyl serpilisi» atalymynda baq synady. Otandastarymyzdyń ókinishine qaraı, bul atalym ıspandyq tennısshi Karlos Alkarasqa buıyrǵan edi. Dese de, Rybakına Qazaqstan sportynyń tarıhynda bul júldege úmitker bolǵan tuńǵysh qazaqstandyq retinde tirkeldi.
Laureus World Sports Awards – jyl qorytyndysy boıynsha úzdik dep tanylǵan sportshylardy yntalandyratyn marapat. Júlde 1999 jyldan beri tabystalyp keledi.
Jeńimpazdy tańdaý eki kezeńnen turady. Alǵashqyda 80-ge jýyq eldiń úzdik sport redaktorlary, jazýshylar men kommentatorlardan turatyn irikteý komıssııasy daýys berip, 6 sanat boıynsha úzdikterdi irikteıdi. Daýys berý barysyn «PricewaterhouseCoopers» JShS táýelsiz aýdıtorlary baqylaıdy. Keıin Laureus World Sports Academy músheleri jasyryn daýys berý arqyly jeńimpazdardy anyqtaıdy.
