Novak Djokovıch Aýstralııa chempıonatynyń eń jasy úlken fınalısi atandy

ASTANA. KAZINFORM – «Úlken dýlyǵa» týrnıriniń 24 dúrkin chempıony, serbııalyq tennısshi, álemniń 4-raketkasy Novak Djokovıch sporttyq jolynda 11-inshi ret Aýstralııa ashyq chempıonatynyń fınalyna shyqty.

Ataqty sportshy jartylaı fınalda tórt saǵattan astam ýaqytqa sozylǵan asa tartysty básekede álemniń 2-raketkasy, 24 jastaǵy ıtalııalyq ıAnnık Sınnerdi 3:6, 6:3, 4:6, 6:4, 6:4 esebimen jeńdi.

OptaAce saıtynan alynǵan málimetke qaraǵanda, N.Djokovıch Aýstralııa chempıonatynyń fınalyna shyqqan eń jasy úlken tennısshi atandy. Ol mundaı nátıjege 38 jas 241 kúnge tolǵan sátinde qol jetkizdi. Sóıtip ol Ken Rozýoldyń 1972 jylǵy kórsetkishinen (37 jas 57 kún) asyp tústi.

Novak Djokovıch jeksenbi kúni fınalda álemniń 1-raketkasy, ıspanııalyq Karlos Alkaraspen chempıondyq ataqqa talasady.

Serbııalyq tennısshi dúısenbide jańartylatyn álemdik reıtıngide 3-orynǵa kóteriledi. 

Senbi kúni Melbýrnda áıelder arasynda qos birdeı sportshy Qazaqstan tennısi tarıhynda alǵash ret fınalda óner kórsetedi. 

Elena Rybakına jekeleı synda sońǵy básekede álemniń 1-raketkasy, Belarýs ókili Arına Sobolenkomen oınaıdy.

Anna Danılına serbııalyq Aleksandra Krýnıchpen birge juptyq synda belgııalyq Elıze Mertens – qytaılyq Chjan Shýaımen fınaldyq matchty ótkizedi.

Sondaı-aq jasóspirimder arasynda 17 jastaǵy Zańǵar Nurlanuly amerıkalyq Kıton Hanspen fınalǵa shyǵý úshin talasady. 

Eske sala keteıik, budan buryn Zańǵar Nurlanulynyń Aýstralııa chempıonatynda alǵash ret jartylaı fınalǵa shyqqanyn jazǵan edik.