Novak Djokovıch altynshy ret ATP qorytyndy týrnıriniń chempıony atandy
ASTANA. QazAqparat – Álemniń 8-raketkasy, serbııalyq Novak Djokovıch altynshy ret ATP qorytyndy týrnıriniń chempıony atandy, dep habarlaıdy QazAqparat tilshisi.
Italııanyń Týrın qalasyndaǵy «Pala Alpıtýr» stadıonynyń ortalyq kortynda ótken fınaldyq matchta N.Djokovıch álemniń 4-raketkasy, norvegııalyq Kasper Rýýdty 7:5, 6:3 esebimen utty.
Osylaısha, qorytyndy týrnırde altynshy ret úzdik shyqqan Novak tıtýl jóninen rekordshy, shveıtsarııalyq Rodjer Federermen teńesti. Sonymen qatar 35 jastaǵy N.Djokovıch chempıon atanǵan eń jasy úlken tennısshi atandy. Bul jóninen de Federerdiń rekordyn jańartty.
Týrındegi jeńisi úshin serbııalyq tennısshi 1500 reıtıngilik upaıǵa qol jetkizip, 4 mln astam AQSh dollary kóleminde tabys tabady. Osy tıtýly arqasynda álemdik reıtıngte besinshi satyǵa kóteriledi.
Novak Djokovıchtiń bıyl Astana Open ATP 500 jarysynda úzdik shyqqany belgili.
Eske sala keteıik, budan buryn Elena Rybakınanyń qazaqstandyqtardyń qoldaýyn sezinetini týraly aıtqanyn jazǵan bolatynbyz.
Elena Rybakına sondaı-aq álemniń «Jyl oıynshysy» ataǵyna úmitker atandy.
Qazaqstandyq jas tennısshi Ispanııadaǵy týrnırdiń absolıýtti chempıony atandy.
Foto: Getty Images
