Notasyz oryndalǵan 110 án: Jambyl oblysynyń ánshisi álemdik rekordqa úmitker
ASTANA. KAZINFORM — Jambyl oblysynyń ánshisi Baqyt Shaǵyrbaev 110 ándi notasyz ári fonogrammasyz oryndap, baıanmen 6 saǵat 40 mınýt boıy úzdiksiz óner kórsetti. Onyń nátıjesi bir aı buryn Semeıde tirkelgen kórsetkishten asyp tústi. Degenmen rekordtyń resmı mártebesi GBR komıssııasy rastaǵannan keıin ǵana beriledi.
Jańa rekord ornatý áreketi 22 shilde kúni Taraz qalasynda ótti. Ótinim talaptaryna sáıkes, Qazaqstannyń eńbek sińirgen qaıratkeri Baqyt Shaǵyrbaev 6 saǵattan astam ýaqyt boıy baıanmen ózin-ózi súıemeldep, 110 ándi úzdiksiz oryndaýy tıis boldy. Óner kórsetý kezinde nota, mátinder, telesýfler, fonogramma nemese hordyń kómegin paıdalanýǵa ruqsat berilmedi. Mýzykant tek óz daýysyna, aspabyna jáne jadyna ǵana súıendi.
Ol ár ándi orta eseppen 3–4 mınýttan oryndady. Mundaı marafon ánshiniń daýysyna, jadyna, qolynyń tózimdiligine jáne jalpy fızıkalyq daıyndyǵyna úlken synaq boldy.
Baqyt Shaǵyrbaev úshin negizgi baǵdar retinde Qaırat Qabyshaevtyń kórsetkishi alyndy. Ol 2026 jylǵy 10 maýsymda Semeı qalasynda 102 dástúrli qazaq ánin oryndaǵan bolatyn. GBR derekterine sáıkes, onyń óner kórsetýi 5 saǵat 37 mınýtqa sozylyp, notasyz, mátindik kómekshilersiz, telesýflersiz jáne fonogrammasyz ótken. Bul jetistik bir oryndaýshynyń dástúrli qazaq ánderin eń kóp ári úzdiksiz oryndaýy nomınatsııasy boıynsha tirkelgen.
Osylaısha, Baqyt Shaǵyrbaev aldyńǵy nátıjeden 8 ánge artyq oryndap, óner kórsetý uzaqtyǵyn bir saǵattan astam ýaqytqa ulǵaıtty.
Buǵan deıin, 2025 jyly elordalyq «Qorqyt» etnoansambli notasyz jáne dırıjersiz 4 saǵat 20 mınýt ishinde 80 shyǵarmany oryndaǵan bolatyn. Alaıda ol ansambldik nomınatsııa bolsa, Baqyt Shaǵyrbaevtyń qazirgi áreketi baıanmen ózin-ózi súıemeldeı otyryp, jeke oryndaý sanatyna jatady.
Baqyt Shaǵyrbaev Qarataý bókterindegi Tamdy aýylynda dúnıege kelgen. Ákesi syrnaı tartyp, ata-anasy birge án aıtatyn. Alǵashynda dombyra shertýdi meńgergenimen, keıin baıannyń súıemelimen án aıtýǵa qyzyǵyp, sodan beri bul aspaptan qol úzbeı keledi.
Aıta ketý kerek, GBR — jetistikterdi tirkeıtin derbes uıym. Onyń resmı saıtyndaǵy málimetke sáıkes, óner kórsetý aıaqtalǵannan keıin sarapshylar beınejazbalardy, qujattardy, kýágerlerdiń aıǵaqtaryn jáne basqa da materıaldardy jan-jaqty zertteıdi.
Sondyqtan marafon sátti aıaqtalǵanymen, Baqyt Shaǵyrbaevtyń rekord ıesi retindegi resmı mártebesi GBR komıssııasy nátıjeni qarap, rastaǵannan keıin ǵana beriledi.
Eske salaıyq, qazaqstandyq oqytýshy 5 saǵatta 100-den astam án oryndap, dúnıejúzilik rekordtar kitabyna endi.
