Notarıýstarǵa eńbek ótili boıynsha qoıylatyn talap ózgeredi - Ádilet mınıstrligi

ASTANA. QazAqparat - QR Ádilet mınıstrligi notarıýsqa kandıdattar úshin eńbek ótili boıynsha talapty joǵarylatpaq, dep habarlaıdy QazAqparat.

«Búginde notarıýs ataný úshin zańgerlik mamandyq boıynsha eńbek ótiliniń eki jyldan kem bolmaýy, taǵylymdamanyń bir jyldan az bolmaýy jáne attestatsııadan ótýi talaptaryn eskeredi. Sonymen birge Anglııada notarıýs laýazymyna qoljetimdilikte zańgerlik mamandyq boıynsha 5 jyldan kem emes jumys isteýi talap etiledi. Shveıtsarııada 4,5  jyl zańgerlik qyzmetten keıin ǵana notarıýs atanýǵa bolady. Sondyqtan da Ádilet mınıstrligi kezeń-kezeńmen eńbek ótili boıynsha talaptardy ekiden bes jylǵa deıin arttyrýda qarastyryp otyr», - dedi Ádilet mınıstri Marat Beketaev Májilistegi Úkimet saǵatynda.

Onyń sózine qaraǵanda, qysqartý múmkindiginsiz notarıýsta bir jyldyq taǵylymdamadan ótý talabyn bekitý josparlanyp otyr.

«Taǵylymdamadan ótý - kásibı daıarlyqtyń mańyzdy bóligi. Mysaly, GFR-da úmitker notarıýs kómekshisi retinde úsh jyldyq óndiristik tájirıbeden ótýi qajet. Frantsııada eki jyl, onyń ishinde jarty jylǵa jýyq basqa mamandarda, ıaǵnı advokattarda, býhgalter-revızorda nemese kompanııalardyń zańgerlik qyzmetterinde tájirıbemen qamtylýy tıis», - dedi Beketaev.