Notarıýstardy lıtsenzııadan aıyrý tetikterin keńeıtetin zań jobasy maquldandy
ASTANA. KAZINFORM — Májilistiń jalpy otyrysynda notarıattyq qyzmetti jetildiretin zań jobasyn birinshi oqylymda maquldady.
— Zań jobasynda atqarýshylyq jazbany tek boryshkerdiń tirkelgen jeri boıynsha jasaý normasyn bekitý usynyldy. Boryshkerdiń turý aımaǵy sáıkes kelmese, atqarýshylyq jazbaǵa avtomatty túrde buǵat qoıý tetigi engiziledi, — dedi qujatty tanystyrǵan depýtat Nursultan Baıtilesov.
Sondaı-aq, ol boryshkerdiń ústinen atqarýshylyq jazba tússe, notarıýstar ony «Elektrondyq úkimet» portaly men SMS arqyly habarlaýǵa mindetteletinin aıtty.
— Zań jobasymen notarıýstardyń jeke sot oryndaýshylarymen, mıkroqarjy uıymdarymen jáne ózge de qatysy bar tulǵalarmen baılanystylyq faktilerin boldyrmaý úshin qosymsha shekteýler belgileý usynylady.
Atap aıtqanda, jaqyn týystyq nemese ózge de táýeldilik bolǵan jaǵdaıda notarıattyq áreketter jasaýǵa tyıym salýdy kózdeıdi, — dedi Nursultan Baıtilesov.
Zań jobasy notarıýstardy memlekettik jáne kvazımemlekettik sektor sharttary boıynsha atqarýshylyq jazba rásimdeý quzyretinen aıyrady.
— Bul máseleler jan-jaqty jáne tolyq qaraý úshin sottyń qaraýyna beriledi. Notarıýstardyń «Notarıat týraly» Zań talaptaryn jáne derbes derekterdi qorǵaý týraly zańnamany buzǵany úshin jaýapkershiligin kúsheıtý de kózdeledi, — dedi Májilis depýtaty.
Jalpy qujatta mynadaı negizgi normalar kózdelgen:
— atqarýshylyq jazbany Biryńǵaı notarıattyq aqparattyq júıe arqyly notarıýstar arasynda avtomatty túrde bólý;
— notarıýstar lıtsenzııasynyń qoldanysyn toqtata turý jáne lıtsenzııasynan aıyrýǵa negiz bolatyn sebepterdiń qataryn keńeıtý arqyly jaýapkershilikti kúsheıtý;
— notarıattyq elektrondyq arhıvti qalyptastyrýdyń tártibin zańmen bekitý;
— notarıýstarǵa senimgerlik basqarýǵa berilgen múlikten, kommertsııalyq uıymnyń jarǵylyq kapıtalyndaǵy úlesten jáne jaldaýǵa berilgen múlikten kiris alý quqyǵyn berý.
Buǵan deıin notarıýstardyń qyzmeti boıynsha jańa baqylaý tizimi bekitilgenin jazǵan edik.
