Notarıýstar sanyna shekteýdi alyp tastaý notarıaldy qyzmettiń krımınaldanýyn jedeldetedi - Á.Janábilova
ASTANA. 19 tamyz. QazAqparat - Notarıýstar sanyna shekteýdi alyp tastaý notarıaldy qyzmettiń krımınaldanýyn jedeldetedi. Bul pikirdi búgin elordada Respýblıkalyq notarıaldy palatanyń tóraıymy Ásel Janábilova bildirdi.
Onyń paıymynsha, Parlament qaraýynda jatqan «QR Notarıat týraly» Zańyna ózgerister men tolyqtyrýlar engizý týraly» zań jobasynyń birqatar kemshilikteri bar. Atap aıtqanda, 2003 jyldan bastap qoldanysta kele jatqan notarıýstardyń sanyn shekteý júıesin joıý aýyldyq jerdegi notarıýstardyń iri qalalarǵa aǵylýyna jol ashady. Bul óz kezeginde notarıýstar arasynda básekeniń kúsheıýine ákeledi. Sonyń saldarynan «korporatıvti notarıýstar» jáne «birkúndik notarıýstar» paıda bolady. Al olar úshin azamattyq-quqyqtyq mámlilerdi rásimdeý barysynda zańdylyqty saqtaý mańyzdy emes. Tek ekonomıkalyq turǵydan ózin ózi qamtamasyz etse bolǵany.
Osyǵan oraı Qazaqstannyń notarıaldy qoǵamdastyǵynyń ókilderi Ádilet mınıstrligi ázirlegen zań jobasy notarıat ınstıtýty damýynyń qazirgi zamanǵy kezeńine sáıkes kelmeıdi dep sanaıdy.
