Notarıattyq ýákilettigi joq adamdardyń notarıýstar joq kezde olardyń jeke móri men blankilerin paıdalanǵany anyqtaldy - Ádilet mınıstrligi
ASTANA. Maýsymnyń 22-si. QazAqparat /Qanat Mámetqazyuly/ -Ádilet organdarynyń tekserýiniń nátıjesinde notarıattyq is-áreket jasaýǵa ýákilettigi joq adamdardyń notarıýstar joq kezde olardyń jeke móri men blankilerin paıdalanyp, notarıattyq sharalar jasaǵany aıqyndaldy.
Bul týraly QR Ádilet mınıstrliginde ótken brıfıng barysynda vedomstvonyń resmı ókili Erbolat Erimbet málim etti.
«Aıtalyq, respýblıkanyń jekemenshik notarıýstary Qazaqstannan tys jerge ketkende, kómekshilerin nemese týystaryn notarıattyq qyzmetti úzdiksiz júzege asyrý úshin ornyna qaldyryp ketedi. Bul rette qandaı da bir notarıattyq is-áreketti jasaýǵa ótinish bildirgen azamattar bul qyzmetti ýákilettigi joq adamnyń jasap otyrǵanyna tipti de kúmán keltirmeıdi. Zań júzinde notarıýstardyń kómekshileri jáne týystarynyń notarıýstar atynan notarıattyq is-áreketter jasaýǵa quqy joq», dedi E. Erimbet.
Onyń aıtýynsha, 2010 jylǵy 5 aı ishinde ýákilettigi joq adamdardyń notarıattyq is-áreket jasaýynyń 17 faktisi anyqtalǵan. Bundaı zań buzý jolymen jasalǵan notarıattyq áreketterdiń jalpy sany 6 myń 472-ni quraıdy. Jalpy búgingi kúnge deıin Ádilet mınıstrligi notarıattyq qyzmetti júzege asyrý quqyǵyna 4 myń 454 memlekettik lıtsenzııa berse, is júzinde olardyń 1 myń 858-i jeke notarıýstyq qyzmetti júzege asyryp keledi. Qazirgi tańda joǵaryda atalǵan jaǵdaılarǵa sáıkes, 14 notarıýstyń lıtsenzııasynyń qoldanysy 6 aı merzimge toqtatylǵan.
