Notarıattyq qyzmetti tsıfrlandyrýda qandaı jańashyldyq engizilmek
Qujat Parlament depýtattary bastamashylyǵymen daıyndaldy.
«Elimizde qyzmeti júıeli, qalyptasqan notarıattyq qyzmet atqarylady.17 aımaqtyq, 1 respýblıkalyq notarıattyq palatada, 4267 notarıýs qyzmet atqaryp keledi. Zamanaýı notarıat qyzmetin odan ári normatıvtik retteý úshin jańa qajettilikter týyndap otyr. Maqsat - notarıat salasynda azamattardyń zańdy múddelerin qorǵaýdyń quqyqtyq júıesin jetildirý. Jobada «notarıattyq akt» uǵymyn engizý, notarıattyq qupııany reglamenteý, basqarý organdarynyń ókilettikterin naqtylaý, jańa notarıattyq is áreketterdi engizý, elektrondyq notarıat qalyptastyrý jáne taǵy basqa mańyzdy naqtylaýlar bar», - dedi Senat depýtaty Lázzat Súleımen.
Atap aıtqanda, notarıattyq qyzmetti odan ári tsıfrlandyrý eskerilgen. Notarıattyq qujattardyń elektrondyq nysanda saqtalýyn, esepke alynýy men paıdalanylýyn qamtamasyz etetin elektrondyq júıe (repozıtarıı) qurý kózdelip otyr. Bul jerde, zań jobasy qaǵazdaǵy qujat pen elektrondyq qujattyń teń mándiligin kýálandyrýdi qamtamasyz etýdi de mindettep otyr. Notarıattyq qujatqa QR-kod beriledi, osy negizde saqtalady, túpnusqalyǵy rastalady. Bul repozıtarıı 2022 jylǵy 1 qańtardan júzege asa bastaýy tıis.
Biryńǵaı notarıattyq aqparattyq júıege málimetterdi engizý, qol jetkizý, paıdalaný, qorǵaý tártibin ýákiletti organdar naqty reglamenttep, aıqyndaýy qajet. Bul baǵytta Ádilet mınıstrligi, Tsıfrlandyrý mınıstrligi, Respýblıkalyq palata aldynda osy qyzmetti saýatty úılestirý mindetteri tur.
«Notarıýstardyń qyzmetterine shaǵymdardy qaraıtyn – Tártiptik komıssııa qurylady, ol táýelsiz organ bolyp sanalady jáne Respýblıkalyq notarıattyq palatanyń sezinde saılanyp, esep beredi. 2020 jyly 33 notarıýstyń lıtsenzııasy ýaqytsha toqtatylǵan.
Engizilip otyrǵan ózgerister, notarıýstar men zańgerler kezdesýi barysynda týyndaǵan usynystardyń nátıjesi», - dedi senator.
Senat spıkeri Máýlen Áshimbaev atalǵan zań elimizde notarıat ınstıtýtyn odan ári jetildirýdi kózdeıtinin atap ótti.
«Qazirgi tańda Qazaqstanda bul salada jumys isteıtin tórt myńnan astam notarıýs bar. Osy zań halyqqa notarıattyq qyzmet kórsetý kezinde tsıfrlyq tehnologııalardyń qoldaný aıasyn keńeıtýge múmkindik beredi. Sondaı-aq, notarıattyq qyzmetke qoıylatyn talaptardy kúsheıtýge quqyqtyq negizder qalyptastyrady», - dep atap ótti Senat tóraǵasy.