Notarıattyq qyzmetterdiń sapasyn arttyrý tetikteri naqtylandy - zań
ASTANA. KAZINFORM — Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine notarıattyq qyzmet máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Májilistiń Zańnama jáne sot-quqyqtyq reforma komıtetiniń málimetine qaraǵanda, qujatty notarıat týraly zańnamany jetildirý jáne notarıattyq qyzmet salasyndaǵy memlekettik baqylaýdyń tıimdiligin arttyrý maqsatynda Qazaqstan Respýblıkasy Parlamentiniń bir top depýtaty ázirledi. Zań notarıattyq is-áreketter jasaý kezinde zańdylyqty qamtamasyz etýge jáne notarıattyq kórsetiletin qyzmetterdiń usynylý sapasyn arttyrý úshin jaǵdaı jasaýǵa baǵyttalǵan.
Zańda jobasynda, atap aıtqanda, mynadaı normalar kózdelgen:
- «Notarıat týraly» Zańnyń sheńberinde notarıattyq qyzmet salasyndaǵy zańnamanyń saqtalýyna memlekettik baqylaýdy júzege asyrý tártibin aıqyndaý;
- notarıýs «Derbes derekter jáne olardy qorǵaý týraly» Zańdy buzǵan jaǵdaıda notarıýs lıtsenzııasynyń qoldanysyn alty aıǵa deıingi merzimge toqtata turý úshin qosymsha negizderdi engizý, sondaı-aq notarıýs memlekettik qyzmet ótkergen nemese QR Parlamentiniń depýtaty nemese máslıhat depýtaty etip saılanǵan kezeńde onyń lıtsenzııasynyń qoldanysyn toqtata turý;
- notarıýs notarıattyq is-áreketter jasaǵan kezde notarıat týraly zańnamany jáne «Derbes derekter jáne olardy qorǵaý týraly» Zańdy birneshe ret (eki jáne odan da kóp ret) buzǵan jaǵdaılarda notarıýsty lıtsenzııadan aıyrý;
- notarıýstyń elektrondyq tsıfrlyq qoltańbanyń jabyq kiltin basqa adamdarǵa zańsyz berý faktisi anyqtalǵan jaǵdaıda, notarıýsty lıtsenzııadan aıyrý;
- notarıýs notarıattyq is-áreketter jasaǵany týraly málimetterdi biryńǵaı notarıattyq aqparattyq júıege engizý merzimderin birneshe ret (on eki aı ishinde eki jáne odan da kóp ret) buzǵan jaǵdaıda notarıýs lıtsenzııasynyń qoldanysyn toqtata turý;
- respýblıkalyq jáne aýmaqtyq notarıattyq palatalar tóraǵalarynyń, sondaı-aq tártiptik komıssııalardyń tóraǵalary men músheleriniń ókilettik merzimine qosymsha talaptar men shekteýler engizý;
- azamattardyń konstıtýtsııalyq is júrgizý sheńberinde memleket kepildik bergen zań kómegin alý tártibin jetildirý.
Buǵan deıin Májilis depýtaty Nursultan Baıtilesov notarıýstarda derbes derekterdi qorǵaý tetikterine qatysty túsinik berdi.
