Notarıattyq qyzmetter tsıfrlyq formatqa kóshedi
ASTANA.KAZINFORM — Úkimet otyrysynda QR Ádilet mınıstri Erlan Sársembaev jańa tsıfrlyq E-Notary platformasy iske qosylatynyn málimdedi.
— Jasandy ıntellekt jáne tsıfrlyq damý mınıstrliginiń belsendi qoldaýymen Ádilet mınıstrligi jańa tsıfrlyq E-Notary platformasyn iske qosyp jatyr. Ol qoldanystaǵy tsıfrlyq sheshimderdiń tájirıbede anyqtalǵan máselesin joıyp, notarıattyq áreketterdiń ashyqtyǵy men ony baqylaýdyń joǵarǵy deńgeıin qamtamasyz etedi, — dedi ol.
Sonymen birge, platformada notarıýstyń árbir áreketi tirkelip qana qoımaı, notarıýstar men azamattardy bıometrııalyq sáıkestendirý júıesin ıntegratsııalaý alǵash ret kózdelgen. Bul eseptik derekterdi zańsyz paıdalanýdy joıady jáne aqparattyq qaýipsizdik deńgeıin barynsha arttyrady.
— Budan bylaı azamattar platformada jeke kabınet ashyp, onyń kómegimen ózderiniń qatysýymen jasalǵan barlyq notarıattyq áreketti baqylap, esepke alyp jáne qadaǵalap otyrady. Qajet bolǵan jaǵdaıda notarıýstardyń zańsyz áreketterine qarsylyq bildirýine bolady. Bul jerde notarıattyq jazba jasaý úshin ótinishterdi avtomatty túrde bólý kózdeledi. Bul teń júktemeni qamtamasyz etýge, boryshkerdiń notarıýsty tańdaý múmkindigin joıýǵa jáne olardyń arasyndaǵy sóz baılasý qaýpin azaıtýǵa múmkindik beredi, — dedi mınıstr.
Onyń sózinshe, taǵy bir jańashyldyq — JI elementterin usynylǵan qujattarǵa taldaý júrgizý, yqtımal kemshilikter men táýekelderdi anyqtaý, tıisti usynymdar ázirleý kezinde paıdalaný.
— Áıtse de, notarıattyq áreketti jasaý týraly túpkilikti sheshimdi notarıýs ózi qabyldaıdy. Platformany pılottyq paıdalaný qorytyndysy boıynsha ony aǵymdaǵy jyldyń sońyna deıin elimizdiń búkil aýmaǵynda engizý josparlanyp otyr, — dedi Erlan Sársembaev.
Aıta keteıik, buǵan deıin notarıattyq qyzmetterdiń sapasyn arttyrý tetikteri naqtylanǵanyn jazǵanbyz.
