Nóserli jańbyrdyń saldarynan Astana kúni merekesine arnalǵan basty kontsert bolmaı qaldy

Astananyń týǵan kúni qurmetine bir jeti boıy ótken merekelik is-sharalardy qorytyndylaıtyn «Astana - baqyt mekeni» atty gala-kontsert 6 shilde kúni, saǵat 21.00-de «Qazaq eli» monýmentiniń aldyndaǵy alańda ótýi tıis bolatyn. Alaıda kontsert bastalýǵa az qalǵanda nóserli jaýyn bastaldy. Uıymdastyrýshylar kórermender úshin aldyn ala sý ótkizbeıtin jamylǵylardy qarastyryp qoıǵanymen, tolassyz jaýǵan jańbyr kontsert bastalýy tıis ýaqyttan keıin de tyıylmaǵandyqtan, aldymen balalaryn ertip kelgender men qart kisiler, odan keıin barlyq kórermender úılerine qaıta bastady. Sý ornatylǵan júzdegen tehnıkaǵa saldaryn tıgizdi.

Uıymdastyrýshylardyń jospary boıynsha, ol ádettegi kontsertterge uqsamaıtyn, jaryq qondyrǵylardyń kómegimen qoıylatyn, áserli mýzykalyq spektakl bolatyn. Ol úshin ashyq aspan astynda aýmaǵy 2500 sharshy metrlik tórt qabatty sahna, kólemi 450 sharshy metrlik ekrandar qoıylǵan alyp qabyrǵalar jáne 10 myń kórermenge arnalǵan oryndar jasaqtaldy.

Sahna dızaınyn jaqynda Reseıdiń Qyzyl alańynda qala kúnin uıymdastyrǵan máskeýlik mamandar jasady. Jaryq shamdar shoýyn jasaý úshin barlyǵy jarty myńnan astam jaryq berýshi qondyrǵylar ornatyldy. Olardyń ishinde kúrdeli dınamıkalyq jaryq qondyrǵylardyń sany - 300-den astam. Shoýdy qalanyń kez-kelgen jerinen astananyń árbir turǵyny kóre alý úshin sáýlesi 10 shaqyrymǵa deıin jetetin 5000 Vattyq joǵary qýatty ksenon projektorlar qoıyldy.

Al jaryq shoýynyń stsenarııin basynan-aıaǵyna deıin ázirlegen - Sıdneıdegi Olımpıada oıyndaryn, Delıdegi Dostastyq oıyndaryn jáne 2011 Evrovıdenıeni qoıǵan jaryq boıynsha tanymal sýretshi - Djerrı Appelt (Germanııa).

Uıymdastyrýshylardyń sózine qaraǵanda, gala-kontsertti ázirleýmen barlyǵy 1500-den astam adam aınalysty. Tehnıkalar 4 elden 5 júk áýebortymen jáne 10 júk kóligimen jetkizildi. Qazaqstanda buryn-sońdy bolyp kórmegen shoýdy jasaý úshin stsenarıılik-rejısserlik jáne qoıylym jumystary salasyndaǵy - kompozıtorlar, horeograftar, ınjenerler, stsenograftar, dekoratsııa sýretshileri, sahnany jaryqpen, dybyspen, arnaıy effektilermen qamatamasyz etýshiler, ekran tehnologııasynyń mamandary, menedjment, logıstıka jáne taǵy da basqa mamandar jarty jyl boıy ázirlik júrgizdi.

Kontsertte tanymal otandyq juldyzdardyń óner kórsetýi josparlandy.

Kontsertke kirý aldyn ala taratylǵan shaqyrý bıletterimen júzege asyryldy. Sharaǵa sol kúni týǵan kúnin atap ótken Prezıdent N.Nazarbaevtyń qatysýy kútildi.