Nóserden qıraǵan Túrgen kópiri úsh aıda qaıta salynady
ASTANA. KAZINFORM — Túrgen ózeni shaıyp ketken kópirdi qalpyna keltirý bastaldy.
Birneshe apta buryn tolassyz jaýǵan nóser saldarynan Túrgen sýy arnasynan tasyp, ózen arqyly ótetin kópir shaıylyp ketti. Bul nysan 2024 jyly apatty dep tanylǵan.
Almaty oblysy ákimdiginiń habarlaýynsha, qazirgi tańda jaýapty merdiger anyqtalyp, kópir qaıta qalpyna keltirilip jatyr. Qurylys úsh aı ishinde aıaqtalady dep josparlanǵan.
— Qazirgi tańda munda 4 tehnıka jumys istep tur. 10-nan astam qyzmetker eńbek etip jatyr. Kópir qurylysy bir apta buryn bastalǵan. Demontajdaý jumysy tolyq aıaqtalyp, burǵylaý sharasyna daıyndyq júrgizilip jatyr, — delingen habarlamada.
Merdigerdiń aıtýynsha, qarasha aıynda jumys tolyǵymen aıaqtalady.
Eske salaıyq, buǵan deıin Almaty oblysynda sý deńgeıiniń kóterilýine baılanysty «Túrgen — Asy» avtojolynyń eki ýchaskesin sý shaıyp ketkenin habarlaǵanbyz.
