Nóser jaýyn Tbılısı kósheleri men joldaryndaǵy kólik qozǵalysyn qıyndatty
ASTANA.KAZINFORM - Tbılısıde túnde jaýǵan nóser jaýyn Grýzııa astanasynyń keıbir aýdandarynda sý tasqynyna ulasyp, ınfraqurylym men jol jamylǵylaryna aıtarlyqtaı zaqym keltirdi. Elde kólik qozǵalysy qıyndady.
Tbılısı meri Kaha Kaladze nóser jaýyn qalanyń keıbir kósheleri men dańǵyldarynda qıyndyq týdyrǵanyn habarlady.
-Qysqa merzim ishinde óte kóp mólsherde jaýyn jaýdy. Keıbir aýdandar men kóshelerde qıyndyqtar týyndady. Kóshelerdi qurylys qoqystary men tastar basyp qalǵandyqtan, jappaı kóshe tazalaý jumystary júrgizilip jatyr. Birqatar ınfraqurylym zaqymdaldy, joldardyń keıbir bólikteri opyryldy, - dedi qala meri.
Tbılısıdiń ártúrli aýdandarynda, sonyń ishinde jaǵalaýlarda, Ýnıversıtet jáne Tamarıshvılı kósheleriniń aınalasynda, qalanyń keıbir bólikterinde sel júrip ótti.
Tazalaý jumystaryna Іshki ister mınıstrliginiń tıisti qyzmetteri men patrýldik polıtsııa da qatysty.
Aldaǵy kúnderi Grýzııada taǵy da jaýyn-shashyn bolýy múmkin.
Buǵan deıin Aýǵanstandaǵy sý tasqyny saldarynan 100-den astam adam habar-osharsyz ketkeni habarlanǵan bolatyn.
