Nóser jaýyn Gazadaǵy bosqyndardyń shatyryn shaıyp ketti
ASTANA. KAZINFORM — Gaza sektorynda jaýǵan qatty nóser men ekpindi jel Izraıl shabýyldary saldarynan baspanasyz qalǵan palestınalyqtar panalap otyrǵan shatyrlardy sý astynda qaldyrdy, dep jazdy Anadoly agenttigi.
Basylymnyń jazýynsha, sektordyń oıpań aımaqtarynda qonys aýdarǵan beıbit turǵyndarǵa ýaqytsha pana bolyp turǵan keıbir shatyrlar mol jaýyn-shashyn saldarynan tolyqtaı sýǵa ketken.
Meteorolog Leıs ál-Allamı «Anadoly» agenttigine bergen suhbatynda eksklavqa jańadan tómen qysymdy tsıklon áser etip jatqanyn, onyń nóser jaýyn men kúshti jelmen qatar júrip jatqanyn habarlady.
Onyń aıtýynsha, aýa raıynyń osyndaı tótenshe jaǵdaılary onsyz da óte aýyr jaǵdaıda ómir súrip jatqan palestınalyqtardyń ahýalyn odan ári ýshyqtyryp otyr. Olar turmystyq eń qarapaıym jaǵdaıdan jurdaı, óte álsiz shatyrlar men ýaqytsha baspanalarda kún kórýge májbúr.
Gaza bıliginiń baspasóz qyzmeti taratqan málimetke sáıkes, shatyrlar men ýaqytsha panalarda derlik eshqandaı qorǵanyshsyz turyp jatqan shamamen 1,5 mıllıon qonys aýdarǵan palestınalyqtyń 250 myńnan astamy qolaısyz aýa raıynan tikeleı zardap shekken.
— Sonymen qatar, birneshe aıǵa sozylǵan Izraıl shabýyldary kezinde zaqymdanǵan kóptegen turǵyn úıler qatty jaýyn men jeldiń saldarynan qırap qaldy. Balama baspana joq, al Izraıl ýaqytsha panalar, qurylys jáne qalpyna keltirý materıaldarynyń jetkizilýine tosqaýyl qoıyp otyrǵandyqtan, palestınalyqtar tolyq qıraý qaýpi joǵary zaqymdanǵan úılerde ómir súrýdi jalǵastyrýǵa májbúr, — delingen habarlamada.
Buǵan deıin Gaza sektoryndaǵy gýmanıtarlyq jaǵdaıdyń asa kúrdeli kúıde qalyp otyrǵany, ásirese balalar úshin ahýaldyń óte aýyr ekeni habarlanǵan bolatyn.