Nóser jaýyn: Almatynyń kommýnaldyq qyzmeti kúsheıtilgen rejımge kóshti

ALMATY. KAZINFORM – Almatynyń kommýnaldyq qyzmeti nóser jańbyrǵa baılanysty kúsheıtilgen jumys rejımine aýystyryldy. 

«Qazgıdromet» RMK málimetinshe, Almatyda 20 maýsym kúni saǵat 15:00-den bastap 21 maýsym saǵat 02:00-ge deıin jańbyr jaýady, keı jerlerde onyń mólsheri 20 mm-ge deıin jetedi. Naızaǵaı oınap, burshaq jaýýy múmkin.

Jel ońtústik-shyǵystan soltústik-batysqa aýysyp, jyldamdyǵy 3-8 m/s, ekpini 15-20 m/s-ke deıin jetedi. Kúndiz aýa temperatýrasy +28…+30 °S bolady.

20-nan 21 maýsymǵa qaraǵan túni ótkinshi jańbyr jaýady. Kúndiz jaýyn-shashyn bolmaıdy. Aýa temperatýrasy túnde +17…+19 °S, kúndiz +31…+33 °S.

22 maýsym kúni – kóshpeli bult shyǵady, kúndiz ótkinshi jańbyr men naızaǵaı bolýy múmkin. Túnde aýa temperatýrasy +20…+22 °S, kúndiz +28…+30 °S.

– Sý basý qaýpiniń aldyn alý maqsatynda 52 mobıldi jedel brıgada kezekshilikke qoıyldy. Olar motopompa jáne qural-jabdyqpen jabdyqtalǵan. Aýdan ákimdikterinde atqarylyp jatqan jumystardy baqylaý maqsatynda táýlik boıy kezekshilik uıymdastyryldy. Kúndizgi ýaqytta 426 arnaıy tehnıka, 26 motopompa jáne 895 jumysshy jumyldyryldy. Qutqarý qyzmeti tarapynan 12 tehnıka jáne 55 qyzmetker, TJD-niń 58 tehnıkasy men 245 mamany tartylady, - dep habarlady ákimdikten.

Osyǵan deıin Almatyda qatty jelden ýnıversıtet ǵımaratynyń shatyry qulaǵan bolatyn.