Nóser jaýyn: Almatynyń kommýnaldyq qyzmeti kúsheıtilgen rejımge kóshti

Qalada jańbyr tollassyz jaýyp jatyr. Osyǵan baılanysty kommýnaldyq qyzmet kúsheıtilgen rejımge kóshti, dep habarlaıdy Kazinform. 

13 qazan túski saǵat 13:30-dan bastap shaharda jańbyr jaýa bastady. Ol erteńge deıin jaýady dep boljanyp otyr.

Almaty ákimdiginiń málimetinshe, kommýnaldyq qyzmetter qala ishin jańbyr sýynan tazartý jumystaryna kiristi.

«Sý tasqynynyń aldyn alý jáne joıý úshin 38 patrýldik brıgada, 168 arnaıy tehnıka, 23 motopompa jáne 757 jol jumysshysy jumyldyryldy. 1 800 qap qum jınaldy. Aýdan ákimdikterinde jumys óndirisin baqylaý boıynsha táýlik boıy kezekshilik uıymdastyryldy», - dep habarlady ákimdikten.

Sınoptıkterdiń boljamynsha, Almatyda jańbyr tańǵa deıin jaýady. Jaýyn-shashyn mólsheri 10-15 mm jetýi múmkin. Kamensk ústirti aımaǵynda platoda jeldiń ekpini 15-20 m/s jetýi yqtımal. Kúndiz aýa temperatýrasy +14 +16 °S bolady, túnde +3+5.