Nóser jańbyrdan keıin Astana kóshelerin sý basyp ketti
Búgin tústen keıin elordada qatty nóser jańbyr jaýdy. Turǵyndar jelide qaladaǵy birqatar kósheni sý alyp ketkenin jazdy.
Eske sala ketsek, buǵan deıin Qazgıdromet elordada 5-7 tamyzda nóser jaýatynyn eskertken bolatyn. Sınoptıkter daýyldyń yqtımaldyǵyn 85-90% boljaǵan.
Elordalyq Aıjan Sarsenovanyń sózinshe, kóshedegi sýaǵarlar bitelip qalǵandyqtan jaýyn sýy káriz sýymen qosylyp kóshege jaıylyp ketken. Al Daul Uahap jaýynan keıin Táýelsizdik dańǵyly boıynda kólikter keptelisi bolǵanyn jazdy.
Elena Gýtsýdyń aıtýynsha kólkigen sýdyń kesirinen qoqys jáshigine barý muń bolyp ketken.
Turǵyndar sý alyp ketken kóshelerdi júrginshiler jaıaý keship júrgenin kórsetetin vıdeo júktedi.
Al, Saryraqa aýdany ákiminiń baspasóz hatshysy Bıbigúl Abyddın Mánshúk Mámetova kóshesinde jańbyrmen birge kelgen qatty daýyl jel aǵashty qulatyp ketkenin habarlady.
«Tabıǵatqa ámir júrmeıdi. Jaman aýa raıy bolmaıtynyn bilsek te, keıde tabıǵat qubylysynyń zardabyn jasyra almaımyz. Quıyp ótken nóser jańbyr kezinde M.Mámetova kóshesindegi aǵash qulap tústi. Kommýnaldyq qyzmet shuǵyl qımyldap, sanaýly mınýtta kólik qozǵalysyn qalpyna keltirdi», - dep jazdy ol Feısbýkte. 
Al, Baıqońyr aýdany ákiminiń baspasóz hatshysy Ásemgúl Tólepbergenova aýdandaǵy birneshe aýmaqty nelikten jańbyr sýy kólkip ketetinin túsindirip ótti.
«Nóser jańbyr kezderinde «Jastar» shaǵyn aýdany, A.Imanov-M.Ǵabdýllın, Respýblıka dańǵyly men Baraev kóshesi qıylystarynda óte kóp sý jınalyp qalady. Bul ýchaskeler túıtkildi aýmaqtar sanalady, óıtkeni ortalyq jańbyr sýy aǵyp ketetin sýaǵar jelige qosylmaǵan. Qazirgi ýaqytta sol mańdaǵy jumystarǵa 15 assenızator kólik pen 3 motosorǵy jumyldyryldy. Barlyq ótinimder boıynsha rejimge sáıkes jumys júrgizilýde», - dep jazdy ol Feısbýkte.
Avtor: Damır Baımanov
