Nóser jańbyr: Stepnogorde 200 tekshe metr sý soryldy

KÓKShETAÝ. QazAqparat – Aqmola oblysynyń Stepnogor qalasynda ortalyq bazar aýmaǵyn basyp qalǵan sý soryldy, dep habarlaıdy QazAqparat tilshisi.

Aqmola oblysy ákimdiginiń málimetinshe, búgin tańerteń Stepnogor qalasynda nóser jańbyr jaýdy. Jaýyn-shashynnyń ortasha aılyq normasynyń 50 paıyzy nemese 56 mıllımetr normasynda 28 mm tústi. Osynyń saldarynan qaladaǵy turǵyn úı aýlalary men ortalyq bazar aýmaǵyn sý basyp qaldy.

«Ókinishke qaraı, nóser jańbyrdan qalanyń ortalyq bazary aýmaǵyndaǵy káriz júıesinen sý aǵyp úlgermedi. Qazirgi ýaqytta, sý basqan aýmaqtardy sorǵytý jumystary júrgizilip jatyr. Jergilikti ákimdik jaǵdaıdy joıý úshin barlyq qajetti resýrstardy tartty. Budan basqa, qaladaǵy turǵyn úı aýlalarynyń aýmaqtaryn tekserý boıynsha monıtorıngtik jumys toby quryldy. Tirshilikti qamtamasyz etetin obektiler shtattyq rejımde jumys istep jatyr. Qaza bolǵandar men zardap shekkender joq», - dedi ákimdiktiń baspasóz qyzmetinen.

Aıta ketsek, budan buryn Býrabaıda tórt adam sýdan qutqarylǵan edi.