Nóser jańbyr saldarynan Frantsııa men Italııany sý basty

NUR-SULTAN. QazAqparat – Frantsııanyń ońtústiginde jáne Italııanyń soltústik-batysynda qatty daýyldan keıin eki adam qaza taýyp, kem degende 25 adam habar-osharsyz joǵalyp ketti, dep habarlaıdy QazAqparat BBC cilteme jasap.

Aleks dep atalatyn daýyl qatty jel men nóser jańbyrǵa ulasyp, sý tasqynyn týdyrdy.

Frantsııanyń ońtústigindegi Nıtstsa qalasynyń aınalasyndaǵy birqatar aýyl zardap shekti. Qala basshysy bul sý tasqynyn eń kúshti sý tasqyny dep sıpattady.

Italııanyń soltústiginde joldar men kópirlerdi sý shaıyp ketti, al birneshe ózen arnasynan asty.

Túnde jaýǵan jańbyrdyń saldarynan eldiń soltústik-batysynda taǵy 17 adam joǵalyp ketti dep habarlandy; Olardyń arasynda taýǵa ketip, oralmaǵan tórt nemis trekkeri bar.