Nóser jańbyr men qar: Ońtústikte aýa raıy qubylyp tur
TÚRKІSTAN. QazAqparat - Túnde jaýǵan nóserli jańbyr shymkenttikter men túrkistandyqtardy ábirgerge saldy, dep habarlaıdy QazAqparat tilshisi.
Ońtústikte tabıǵat tosynsyı tanytyp tur. Shymkent qalasynda túnde jaýǵan jańbyrdan keıbir kósheler men aýlalardy sý basty. Nátıjesinde tótenshe jaǵdaı qyzmetiniń mamandary túnimen sý arnasyn burý, jınalǵan sýdy motopompa arqyly tartý jumystaryn júrgizdi.
«Kezekshilikke jeke quramnan 114 qyzmetker tústi, 38 birlik tehnıka, 28 dana motopompa daıyndyqqa keltirildi. Jalpy jańbyr sýyn sorǵytý jumystaryn júrgizý úshin 12 meken-jaılarǵa kúshter men quraldar jiberildi. Qazirgi tańǵa 482 tekshe metr sý soryldy jáne 70 qum qaby tóseldi. Zardap shekkender men qaıtys bolǵandar joq. Jeke turǵyn úılerge sý kirmegen»,- delingen Shymkent qalasy Tótenshe jaǵdaılar departamentiniń qoǵammen baılanys tobynyń habarlasynda.
Aýa-raıy kúrt qubylyp, jańbyr sońy qarǵa ulasty. Qazir qalada qar shyǵarý jumystary júrgizilip jatyr. Turǵyndardyń qaýipsiz qozǵalysyn qamtamasyz etý úshin aıaldamalar men jaıaý júrginshiler joldarynyń qary tazalanyp, taıǵanaqqa qarsy ınertti materıaldar sebilýde. Jalpy bul jumystarǵa 21 tehnıka, 95 jumysshy jumyldyrylǵan.
Al, Túrkistan qalasynda jaýyn saldaryn joıýǵa 12 sý tartatyn asınızator kóligi, 1 júk tıegish, 11 júk kóligi jumyldyryldy. Anyqtalǵan sý jınalatyn oryndarda 37 drenaj qazyldy.
Jetisaı men Maqtaral aýdanynda jańbyr men jerasty sýynyń kóterilýinen bolǵan jaǵdaı boıynsha mamandar áli de jumys istep jatyr.
