Nóser jańbyrdan keıin Dýbaıdy sý basty: bir adam qaza tapty
ASTANA. KAZINFORM — Birikken Arab Ámirlikterinde kúshti naızaǵaıly jańbyr jalǵasyp jatyr. Bılik turǵyndardy úılerinen shyqpaýǵa, sý basý qaýpi joǵary aımaqtardan aýlaq bolýǵa jáne turaqsyz aýa raıyna baılanysty sapardy shekteýge shaqyryp otyr. Qazirgi ýaqytta nóser jaýynnan keıingi aýqymdy saldarlardy joıý jumystary júrgizilip jatyr, dep jazdy Azertadj.
Gulfnews portalyna silteme jasap habarlaýynsha, aldymen óńirdi qýatty qumdy daýyl basyp, artynan tolassyz jaýǵan jańbyr eldiń eń iri qalalarynyń biri — Dýbaıdy sý astynda qaldyrǵan.
Jýrnalıster taratqan kadrlarda qalanyń kósheleri túgeldeı sýǵa tolyp, qymbat lıýks avtokólikterdiń jol ústinde qalqyp júrgeni kórinedi. Sonymen qatar qatty jel qonaqúıler janyndaǵy jaǵajaılarda ornalasqan jatyn oryndar men qorshaýlardy zaqymdaǵan.
Qaýipsizdik maqsatynda bılik birneshe qalalyq saıabaq pen qoǵamdyq jaǵajaılardy ýaqytsha japty.
Qolaısyz aýa raıyna baılanysty Emirates jáne flydubai áýe kompanııalary birqatar reısterdi keıinge qaldyrdy nemese tolyqtaı toqtatty. Densaýlyq saqtaý jáne qorshaǵan orta mınıstrligi zardap shekken aımaqtardaǵy jeke kompanııalardy 19 jeltoqsanda qashyqtan jumys isteý tártibine kóshýge shaqyrdy. Al Abý-Dabı qalasynda barlyq qoǵamdyq is-sharalar ýaqytsha toqtatyldy.
Ókinishke qaraı, Ras-el-Haıma ámirliginde nóser jańbyr kezinde qabyrǵa qulap, 27 jastaǵy úndistandyq emıgrant Salman Farız qaza tapty.
Ulttyq meteorologııalyq ortalyq el aýmaǵynda jaýyn-shashyn, naızaǵaı, burshaq, qatty jel, shańdy daýyl jáne teńizdegi tolqynnyń kúsheıýi áli de jalǵasýy múmkin ekenin eskertti.
Arabnews saıtynyń jazýynsha, BAÁ Ulttyq meteorologııa ortalyǵy (NCM) beısenbiden jumaǵa deıin el aýmaǵynda, onyń ishinde Dýbaı men astana Abý-Dabı qalalarynda da jaýyn-shashyn bolatynyn eskertken.
Sondaı-aq beısenbi kúni Parsy shyǵanaǵynyń ózge memleketterinde de qatty jańbyr jaýdy. Atap aıtqanda, Saýd Arabııasy men Qatarda nóser jaýyn saldarynan «Arab kýbogynyń» úshinshi oryn úshin ótetin oıyny «Jasyl suńqarlar» quramasy men BAÁ komandasy arasynda josparlanǵan match toqtatylǵan.
Aıta keteıik, Dýbaıda Mercedes-Benz kompanııasynyń elıtaly turǵyn úı kesheni salynady.